2013年日本关西、北陆赏樱自驾游 – Day 3:京都醍醐寺、平安神宫、仁和寺
京都系日本最多赏樱地点嘅城市,如果系满开期间,即使停留三、四日都唔嫌多。我们原本嘅planning系打算留系京都三日赏樱,可惜关西樱花提早左开,所以临出发前改左行程,将留系京都嘅日数缩短到一日半。今日嘅行程重点选择左三个较迟开花嘅京都樱花名所,其他地方因为樱花已经一早开晒,去都冇谓啦。
2013.4.7 | 雨、一时晴
朝早起身第一时间睇下窗外仲有冇落雨,发现天阴阴但雨又唔怕好大,总算比寻日好好多啦。系京都呢两晚酒店都有包早餐,今日食左个和式早餐。
樱花期间酒店大堂每日都会张贴京都主要樱花名所嘅最新开花情况,不过同实际开花情况似乎有一D出入,下图见到好多景点都贴左系满开,但查实已经凋落得七七八八。
另外大堂内亦有提供一D有夜樱嘅赏樱地点嘅开放时间资讯。
食完早餐开车向第一个赏樱名所醍醐寺进发,醍醐寺位于京都駅西边,开车过去要大约半小时。
系前往醍醐寺路上嘅时候都仲唔系好大雨,不过一到步雨势又大起黎,真系扫兴。醍醐寺系京都名刹,不过寺院内外因为落雨关系变得一地泥泞。
原本以为呢度嘅樱花开花期会较长,点知都系已经凋落得七七八八。
入寺内要买门票
寺内其实冇乜野睇,樱花树比寺外仲少。
离开醍醐寺我地开车返去京都市中心,目的地系另一个花期较迟嘅平安神宫,而系平安神宫附近,仲有冈崎疏水、蹴上インクライン呢D赏樱名所,开车经过果陴顺便都睇睇,不过花儿都已经凋落。
呢间系平安神宫附近嘅京都美术馆,佢有个地下停车场,我地就将架车泊呢度,就算落起雨黎上车都冇咁狼狈。
美术馆同平安神宫之间嘅公园入面嘅樱花,似乎系今次旅程到呢刻为止睇到开得最靓嘅樱花,咁好个天又唔再落雨,所以先黎个狂影。
上年都黎过平安神宫,当时因为太早仲未开花,所以冇入去里面嘅神苑,今次虽然系倒返转迟左,但系应该都仲有D花可以睇嘅。
平安神宫入面有人扮演古代人,同佢地影返张相先。
入神苑要买飞,大人每位600円。
虽然已经过左满开,但系神苑入面嘅樱花都仲几OK。
行完平安神宫系时候要食中午饭,今餐去河原町间渔心寿司食。
食完午饭先系寺町通步行街行下,顺便到药房入货。去关西如果要买药品,推荐大家去呢间系寺町通上嘅药房,佢嘅价格系大阪同京都黎讲可以算得上系最平嘅一间,如果星期六黎,仲有9折优惠,超抵。
下午我地再去多一个樱花名所 – 仁和寺。仁和寺嘅樱花品种属于较迟开花嘅御室樱,所以就算其他地方嘅樱花已经凋落,呢度嘅樱花都只系开左5分。
先去到仁和寺停车场泊好架车
停车场旁边有档野卖樱花盆栽
御室樱比其他品种嘅樱花树矮一D,花系白色嘅,似乎冇粉红色嘅黎得艳丽。不过因为呢度较迟开花,所以系我地今次系京都见到最靓樱花嘅地方。
入去仁和寺果阵我地系从停车场旁边嘅侧门进入,走嘅时候专登从正门出去顺便影个正门。
离开仁和寺返酒店嘅时候,我地专登兜去哲学之道,不过冇落车,因为呢度D樱花又系凋落得七七八八,景色唔靓。
最后介绍下今晚食D乜,就系酒店对面近铁京都駅入面呢间江户川鳗鱼饭专门店。
– Day 3 完 –
>> 返回《2013年日本关西、北陆赏樱自驾游》总目录
正呀, thanks for your info !!!!
我而家放心好多了 …………..
去日本我都好中意自駕,因為唔需要去煩D火車資料。
如果要去天橋立咁遠,應該係有需要自己開車啦。
清水寺同八坂神社附近有好多泊車地方,最近清水寺而又大D的停車場在五條坂近七味家,不過我通常係泊高台寺停車場,泊了車沿二年坂三年坂行去清水寺沿唔多野睇。
金閣寺有自己停車場,泊一次好似係800yen
只要不是祭典期間,遊人都唔會太多,泊車位亦足夠,不過如果是祭典期間情況就不同。
WOO WOO …… THX !
其實都揸過日本4~5次, 真係試過日本自駕就唔想再撘車, 當中北海道自駕最爽, 但大阪, 京都好多網友叫我唔好揸……. 但因為想帶老婆去天橋立, 所以我諗照揸…. 市區D駐車場都泊過, 第一次盲中中泊, 但幾過引, 係
京阪D駐車場貴D…….
想問多少少, 請問清水寺 OR 八坂神社, 附近應該有
停車場仔 ? 仲有金閣寺停車場 …. 主要都係去D熱門寺廟,
同埋”理論上”, 星期1~2, 應該比星期6~日少人D掛 ?
THX !!!
京都和大阪雖然車多些,不過自駕都唔難,只是有時候找地方要轉多幾個圈,又或者間中會遇上塞車,尤其放工時間的京都駅附近.
泊車方面其實問題不大,在日本只要有空地,很多都會用來做小型停車場,雖然很多只是可以停泊幾部車,但加起來總數都不少.不過這些泊車位大多數設在內街,所以如果在主街找不到車位,轉入去內街通常都可以找到.另外,京都市中心也有不少地下停車場,也可以使用.
師兄, 嚟近小弟都同老婆國慶假期快閃去4日3夜京阪自駕遊,
其實很多人都說 京, 阪, 神…… 根本不要(用)自駕 …..
但以往游日本, 多數自駕…… 己上引了 ……
雖說會碰上塞車….. 但, 仍很想自駕 ……
你京都覺得難嗎 ? 停車場好難有位 ?