2014年聖誕節北海道賞雪之旅(Day 4) – 二世古Hirafu滑雪場
按計劃今日嘅行程係去二世古最大嘅滑雪場二世古Hirafu(比羅夫)滑雪場，當然我哋唔係去滑雪，只係去睇雪。不過天氣預報今日仍然有大雪，都有啲擔心去唔去得成。
今朝浸完溫泉就食早餐啦，早餐係日式，又係用返尋晚食晚飯張枱。
今日個天比尋日清啲，望出外面可以睇清楚周圍環境，雖然仍然有落雪，但風就唔係好大，應該可以照行程計劃去Hirafu滑雪場。
食完早餐周圍行下先，呢度鏟雪係要出動到鏟泥車架。
邊個咁得閒整咗個雪人
經過一輪努力，鏟泥車終於喺門口鏟出一條路來。
有返條路，另一個要解決嘅問題係要掃走車頂啲積雪，睇落都幾辛苦。
旅館有幾部唔同嘅車可以接送住客，有小巴、MPV同私家車，除咗我哋仲有一批住客應該係去滑雪，見佢哋帶晒啲滑雪嘅重裝備。
由於我哋只得兩個人，又冇乜行李，所以旅館安排咗架私家車載我哋去二世古Hirafu滑雪場。
從車上擋風玻璃望出去只見白蒙蒙一片。
沿途除咗雪都係雪，窗外係Hirafu嘅中心地帶ひらふ十字街(比羅夫十字街)，可能由於大雪，唔見有行人，不過就算停咗雪，喺呢啲地方步行都真係幾舉步維艱。
由我哋住嘅ニセコ昆布温泉鶴雅別荘 杢の抄去二世古Hirafu滑雪場都唔係好遠，喺雪地行車都只係需要15分鐘左右就到。Hirafu滑雪場主要有兩個上山起點，一個係Hirafu Welcome Center，另一個係Niseko Grand Hirafu Mountain Center。Welcome Center係Hirafu滑雪場最主要嘅地方，遊客中心同埋巴士總站都設喺呢度，不過喺Welcome Center只有吊車上山，而Mountain Center果邊除咗吊車之外，仲有纜車(Hirafu Gondola)，所以人比較多。
我哋叫司機喺Niseko Grand Hirafu Mountain Center呢邊俾我哋落車
真係幾熱鬧
好多人排隊坐纜車上山
由於氣溫低又大雪，所以係度唔係影好多相，而且風雪似乎越嚟越大，想上山但係排隊坐纜車嘅人太多，所以睇咗一陣到此一遊之後決定走人。路線巴士唔經Mountain Center，所以要坐路線巴士去JR俱知安駅就要過去Welcome Center果邊，雖然Mountain Center同Welcome Center只係相距700米左右，但要行路過去就真係…超辛苦，好在Hirafu滑雪場有穿梭巴士連接Hirafu各個地點。
終於又返到去JR俱知安駅
因為事前夾啱火車時間，所以喺俱知安駅等咗一陣就有火車返小樽啦。
回程沿途又係白色一片
終於返到小樽
食晏時間，落咗火車順便行過小樽駅旁邊嘅三角市場食碗魚生飯。
今次係小樽book咗呢間喺小樽運河對面嘅小樽運河の宿 小樽 ふる川，呢間溫泉旅館雖然地方唔算大，但地方細細好有特色，而且位置超正，詳細介紹可以參考呢篇《住@小樽運河の宿 小樽 ふる川》。
雖然旅館佔地唔大，但房間面積都唔細，而且對正小樽運河，個景一流。
同其他溫泉旅館，都有送一個小糕點。
Check-in完時間仲早，先出去行下再返旅館食晚飯。小樽係2009年去過一次，當時係秋天，冬天嘅感覺完全兩個世界。
界町通
冬天好早就入黑，不過雪地加街燈喺啱啱入黑嘅時候感覺特別浪漫。
夜晚嘅小樽運河
返到旅館仲未夠鐘食晚飯，先浸個溫泉暖下身。
食晚晚餐，雖然菜色睇落唔算豐富，但味道唔錯。
食完飯冇咩做喺旅館周圍行下
今晚仲有個下午喺北菓樓買嘅年輪蛋糕做消夜
Day 4完，返回《2014年聖誕節北海道賞雪之旅》總目錄
相關文章：
如果喜歡這篇文章，請點個「讚」吧！