2014年聖誕節北海道賞雪之旅(Day 3) – 初遇大風雪@二世古
二世古係北海道著名嘅滑雪勝地，所以今次旅程重點會去二世古，不過因為我哋唔識滑雪，興趣亦唔大，所以只係去滑雪場見識下，酒店亦唔係住喺滑雪場嘅渡假酒店，而係book咗一間二世古嘅溫泉旅館住一晚。
去完二世古之後，我哋會直接去小樽住多晚，之後先返札幌，所以會離開札幌三日兩夜。由於唔係自駕，拖住兩個行李喼去二世古會很麻煩，所以打算將兩個喼寄存喺札幌嘅酒店，點不知，當我哋呢日喺頭兩晚入住嘅札幌三井花園酒店check-out之後要求寄存兩晚行李嘅時候，職員竟然一口拒絕，話除非我哋返嚟之後會住返佢間酒店，唔係就冇得寄存。
果陣真係當堂亂晒，有啲唔知點算，如果要拖住兩件大行李去二世古都唔知點算好，問酒店職員可唔可以通融，但都冇得商量，真係好絕。咁寸，唔求你，好在我哋兩晚後返札幌會住果間札幌世紀皇家酒店就喺隔離，於是拖住行李過去睇下呢間酒店俾唔俾寄存行李。
札幌世紀皇家酒店係高級酒店，服務果然好好多，一去到大堂見我哋拖住行李，大堂職員已經主動問我哋有咩需要幫忙，最重要係當我哋話想寄存果陣，佢哋就即刻處理，而且完全冇問我哋係check-out咗定係未check-in，亦冇叫我哋俾訂房證明佢睇，只係問我哋要寄存幾多日，可能有得對比嘅關係，同埋之前有啲擔心嘅心情影響，果一刻覺得世紀皇家酒店真係好得，而且佢嘅職員仲係講國語嘅同胞，好滚動。
喺世紀皇家酒店寄存咗行李之後，仲有時間可以食埋早餐，呢餐食流心蛋漢堡包。
我哋今次喺二世古入住嘅溫泉旅館叫ニセコ昆布温泉鶴雅別荘 杢の抄，佢有接駁巴士由札幌載住客直接去到旅館，不過一來因為有啲擔心大雪天坐長途巴士會唔會有危險，二來我哋想喺呢日先去溫泉旅館附近嘅二世古國際滑雪場睇下，所以計劃從札幌坐JR去俱知安駅，再轉坐巴士去二世古國際滑雪場，然後再由二世古國際滑雪場坐溫泉旅館去旅館嘅接駁巴士去旅館，所以已經一早向旅館預約好巴士時間，不過最後因為天氣問題，臨時改變計劃，冇去到二世古國際滑雪場。
去俱知安嘅火車票前一晚已經買定咗，由札幌去俱知安嘅JR火車只有旁晚接近六點有一班直通車，其餘時間都需要去小樽轉車，而且由小樽去俱知安嘅JR列車全部都係冇指定席嘅，所以買咗一張自由席乘車券，全日都可以用，但唔可以中途離站。
今日札幌嘅天氣都OK，但火車越向小樽行天氣就越差。
大風大雪，咁嘅情況落車真係幾慘。
到咗小樽，要係呢度轉車，轉車時唔需要離開火車站，只要睇清楚列車嘅月台行去上車就可以。
由於去俱知安或者經過俱知安同二世古嘅列車班次唔多，而且又係冇劃位嘅自由席，所以最好早啲上車，咁先會有位坐。如果係好似我哋咁從札幌出發到小樽轉車，兩班車嘅到站同開車時間相距最好有半個鐘。
從小樽去俱知安沿途都係俾厚厚積雪覆蓋嘅荒山野嶺
終於到達俱知安
俱知安雖然話係二世古地區最大嘅城鎮，但其實人口好少，所以JR車站都係好細。
俱知安係去二世古幾個滑雪場嘅必經之路，所以雖然JR俱知安地方只係細細地，但裡面都有個遊客中心，而且有識講英文嘅職員。
由於風雪太大，我哋有啲擔心如果按照原本計劃坐巴士上去二世古國際滑雪場會有危險，所以決定改變計劃直接去溫泉旅館，於是請遊客中心嘅職員幫我哋打電話去ニセコ昆布温泉鶴雅別荘 杢の抄睇下佢哋有冇車可以過嚟接我哋，不過因為臨時臨急啲司機同車都出晒去接客人，安排唔到，所以唯有轉坐下一班火車去較近旅館嘅二世古站再轉的士去溫泉旅館。
到咗二世古站，呢度比俱知安站仲要細。
外面漫天風雪天寒地凍，好在車站裡面有間細細哋嘅日式Cafe，唔好講咁多先食個午飯醫咗肚暖下個胃。
趁住喺度食嘢當然成機問埋老闆邊度有的士坐啦，咁老闆就遙指對面呢間車房，話車房旁邊呢間小屋係個的士站。
從的士站望返過去JR二世古站
我哋嚟到個的士站阿姐請咗我哋入去屋仔度取暖，然後我哋將想去嘅溫泉旅館地址俾佢睇，之後佢就call的士過嚟，叫我哋坐低等陣。間屋仔有個火爐，真係暖笠笠，如果企喺出面一定好快變雪條。
好快架的士就到咗
雖然好大風雪，幾乎睇唔到路，又分唔出邊度係路，但的士司機車速都唔慢，可能行慣晒，對於佢地好小兒科。
我哋喺二世古入住嘅溫泉旅館叫ニセコ昆布温泉鶴雅別荘 杢の抄，距離JR二世古好近，好快就去到。
雖然好大風雪，但都有幾個日本家庭自己開車嚟。
第一次喺冬天落雪嘅時候入住溫泉旅館，個feel真係唔同啲，而且呢間ニセコ昆布温泉鶴雅別荘 杢の抄真係好得，詳細介紹可以睇返呢篇《住@ニセコ昆布温泉鶴雅別荘 杢の抄》。
我哋住嘅房
由於早咗到，所以留喺溫泉旅館嘅時間多咗，不過都唔怕悶，浸吓溫泉再喺溫泉旅館嘅休息廳hea下，時間好快就過。
又到食晚飯時間
呢個休息大廳令人好舒服，食完飯喺度攤抖吓真係好正，仲可以喺度燒棉花糖。
Day 3完，返回《2014年聖誕節北海道賞雪之旅》總目錄
相關文章：
如果喜歡這篇文章，請點個「讚」吧！