2014年聖誕節北海道賞雪之旅 – 序編

最近更新日期：2024-10-06 | 文章分類：2014年聖誕節北海道賞雪之旅

旅遊教室» 遊記» 2014年聖誕節北海道賞雪之旅» 2014年聖誕節北海道賞雪之旅 – 序編

因為怕凍嘅關係，咁多年嚟都唔想去一D天寒地凍大雪紛飛嘅地方旅行，不過舊年聖誕節終於決定試一試，去咗北海道過一個白色聖誕，嘗試下踏雪嘅滋味。

雖然每次去日本都係自駕，不過自己仲未有信心可以喺大雪下揸車，而經過今次見識過雪地嘅實際路況之下，更加確信對於我哋呢D唔係生活喺北方嘅人，喺雪地下真係唔係太適合自駕。冇得自駕交通就變得麻煩好多，所以今次旅程只係去咗札幌同埋附近嘅小樽同二世古呢兩個地方，行程唔趕，hea住嚟玩。

一、行程與遊記

今次旅程只係去七日，第一日同第七日查實只係坐飛機，所以實際上只有五日時間玩，不過因為我哋去嘅地方唔多，所以都已經足夠。以下是呢七日旅程中每日行程嘅簡介同遊記：

第一日 – 從澳門去札幌，今年同五年前去北海道一樣都係坐大韓航空經首爾轉機，去到新千歲機場大約係下午一點，入到札幌都只係三點幾，不過由於坐零晨機比較攰，所以第一日只喺札幌駅附近行吓商場同地下街。
遊記：2014年聖誕節北海道賞雪之旅(Day 1) – 初踏雪地

第二日 – 第二日嘅行程主要係去北海道神宮，之後就留喺狸小路行街。
遊記：2014年聖誕節北海道賞雪之旅(Day 2) – 北海道神宮

第三日 – 第三日係今次旅程嘅重頭戲，因為今日會去二世古，不過唔好誤會，我哋唔係去滑雪，只係去睇雪同浸溫泉。本嚟計劃先到滑雪場睇下再返溫泉旅館，但卻遇上大風雪，唯有提前去旅館浸溫泉hea下。
遊記：2014年聖誕節北海道賞雪之旅(Day 3) – 初遇大風雪@二世古

第四日 – 呢日朝早冇前一日咁大風雪，所以去咗二世古Hirafu滑雪場睇下，不過好快又有大風雪，所以留咗唔係好耐就坐火車返去下一站小樽。
遊記：2014年聖誕節北海道賞雪之旅(Day 4) – 二世古Hirafu滑雪場

第五日 – 第五日行程主要喺小樽堺町通行街shopping，大雪覆蓋下嘅堺町通同上次秋天所見嘅完全兩個世界，喺度慢慢hea到黃昏，先返酒店攞返行李返札幌。
遊記：2014年聖誕節北海道賞雪之旅(Day 5) – 踏雪遊小樽

第六日 – 去完二世古同小樽之後第六日又返嚟札幌繼續行程，今日原來plan咗去札幌場外市場，但行出地鐵站發現天氣環境好惡劣，最後縮沙冇去，轉戰有瓦遮頭嘅狸小路同地下街，而呢日重點節目係夜晚去大通公園嘅札幌白色燈樹節。
遊記：2014年聖誕節北海道賞雪之旅(Day 6) – 札幌白色燈樹節

第七日 – 今日係旅程最後一日，所以札幌冇行程，因為新千歲機場都有好多嘢睇同好多嘢買，上機前嘅時間就喺新千歲空港影相買嘢。
遊記：2014年聖誕節北海道賞雪之旅(Day 7) – 新千歲空港多啦A夢樂園 (coming soon…)

二、住宿酒店

今次旅程分別入住咗四間酒店，其中兩間係札幌嘅酒店，另外兩間就分別係二世古同小樽嘅溫泉旅館。由於冬天大雪，所以喺札幌嘅酒店專登選擇近札幌駅嘅酒店，方便坐JR，以免冬天拖行李行較長距離嘅路。

喺札幌嘅兩間酒店，位置同質素都好滿意，算係冇揀錯，只係對第一間札幌三井花園酒店嘅服務有D唔滿意。至於今次入住嘅兩間溫泉酒店，就真係超中意，而且喺冬天入住溫泉旅館就更加好feel。下面係今次入住嘅四間酒店：

1. 札幌三井花園酒店(Mitsui Garden Hotel Sapporo)

住宿天數：2晚，Day 1 & Day 2
房間類型：高級雙人房(スーペリアダブルベッド)
住宿費用：兩晚32,400円，不包早餐
訂房渠道：日本樂天旅行

2. 二世古ニセコ昆布温泉鶴雅別荘　杢の抄

住宿天數：1晚，Day 3
房間類型：和洋室(ツインベッド＋畳スペースの、52平米の和洋室)
住宿費用：47,520円，兩人入住，包早餐和晚餐
訂房渠道：日本樂天旅行

3. 小樽運河の宿小樽ふる川

住宿天數：1晚，Day 4
房間類型：運河側ツインルーム
住宿費用：39,100円，兩人入住，包早餐和晚餐
訂房渠道：日本樂天旅行

4. 札幌世紀皇家酒店(Century Royal Hotel Sapporo)

住宿天數：2晚，Day 5 & Day 6
房間類型：時尚雙人房(スタイリッシュダブル)
住宿費用：兩晚27,000円，不包早餐
訂房渠道：日本樂天旅行

三、二世古交通

二世古係今次旅程嘅重點，不過由於冬季北海道不便自駕，所以去二世古不得不乘坐公共交通工具，經過一輪研究，我哋最終選擇咗坐火車，遲吓會將今次計劃行程嘅時候收集到嘅二世古交通資料整理出嚟俾大家參考。

相關文章：