2014年聖誕節北海道賞雪之旅(Day 2) – 北海道神宮
因為我哋怕凍嘅關係，喺咁天寒地凍嘅環境其實都唔多愿意周圍走，所以今日只係計劃去一個景點，就係北海道神宮。其實北海道神宮唔算係札幌嘅熱門景點，不過因為未見過白雪襯托下嘅日本神社，所以專登去睇睇。
酒店門口有今日嘅天氣預報，最高5度最低-2度，睇落都唔係好凍啫，不過天色就麻麻，冇陽光之餘仲可能會有雨。另外，塊牌仲有正在進行中嘅札幌白色燈樹節嘅情報，不過我哋會留返喺平安夜果晚先去。
酒店門口
朝早街上天氣都OK，不過真係好鬼凍。
街上行人路度每隔一段路都會見到呢個箱，裡面有一啲可以溶雪嘅沙，如果有需要可以隨便攞嚟用。
出發去景點之前先食早餐，呢餐食嘅係吉野家。
星期六日札幌地鐵嘅一日乘車券只係520yen，比平日平咗310yen，呢日係星期六，搭地鐵抵過平時。
北海道神宮就喺円山公園裡面，如果平時冇落雪嘅話，由地下鐵円山公園駅行10分鐘就到，不過冬天落雪嘅時候都係坐一程巴士好啲。喺地下鐵円山公園駅3號出口旁邊有一個巴士總站，可以喺呢度坐開去北海道神宮同動物園方向嘅巴士。
從円山公園駅出發，一個站就到北海道神宮，個巴士站叫神宮前。
除咗札幌駅至簿野呢啲市中心嘅行人路會有人定時鏟雪之外，其他地區嘅行人路都係咁嘅樣，完全俾積雪覆蓋，行起嚟都幾辛苦，又唔行得快。
行路嘅時候真係要睇實地下，呢啲好多人行過變晒黑色嘅路面已經結咗冰，最好唔好行，唔係好有機會俾佢跣到你攤攤腰，最好搵一啲白色未結冰嘅雪地嚟行。
北海道神宮正門入口
入神宮前淨手嘅地方
神宮正門
北海道神宮地方唔大，主要建築就只得呢個主殿。
同其他神社或者寺院一樣，呢度都有各種神符賣，亦可以求簽。
神宮旁邊有間細細地嘅六花亭神宮茶屋店，天寒地凍入去食件熱糕點加杯熱茶就最正。
回程可以走過對面馬路坐返同一隻巴士返去円山公園駅。
去完北海道神宮，餘下嘅時間就留返喺室內行街shopping，主戰場係狸小路。
呢間Richmond Hotel喺正狸小路中段，位置超正，今年7月再去北海道果陣就住咗呢間。
中場休息，上咗pivot商場樓上間Cafe fe lice high tea。
繼續喺札幌駅前通下面條地下街shopping
札幌駅前通下面條地下街可以由簿野一直通到去札幌駅，不過商店主要集中係簿野駅至大通公園駅果段，大通公園駅至札幌駅呢段主要作用係作為行人通道，比較少商店。
今晚呢餐冇尋晚食得咁好，只係上咗札幌駅上面嘅拉麵共和國食拉麵。
飯後水果，買返酒店食。
仲買定聽日坐火車食嘅小食，其中一樣係薯條三兄弟，最近見到樂天市場都有得買。
因為自己帶去嘅手套唔夠厚，咁啱見到呢隻牌子嘅手套，所以買咗兩對即時用。
臨返酒店前，先去埋JR札幌駅西口出面嘅JR售票處買定聽日去二世古嘅火車飛。
Day 2完，返回《2014年聖誕節北海道賞雪之旅》總目錄
相關文章：
如果喜歡這篇文章，請點個「讚」吧！