2014年聖誕節北海道賞雪之旅(Day 1) – 初踏雪地
同2009年果次去北海道一樣，今次都係過香港坐大韓航空經首爾轉機，無他，因為平，聖誕節旺季都係5千蚊有找，而且澳門亦冇機直飛北海道，不過因為零晨機，上次試過已經知道會好辛苦。
呢兩個新喼今年新買冇幾耐
去香港機場最後一班船係夜晚八點，我哋坐零晨一點機，去到機場仲要呆等差唔多四個鐘。12月澳門碼頭剛剛重新裝修完，真係大咗又靚咗喎。
大韓航空由香港經首爾去札幌會先坐一程機由香港去仁川機場，再轉坐另一班機去札幌，所以喺香港機場check-in時已經出定兩程機嘅登記證，而行李就會由香港直掛札幌，轉機果陣唔使攞行李。
聖誕節出遊嘅人真係好多，呢程由香港去首爾嘅機full晒。
到咗仁川機場轉機旅客要過安檢先可以去返候機樓，記得09年果次好似冇咁嚴。
上次轉機知道候機樓有可以俾人休息嘅地方，因為仲要等差唔多四個鐘先上機，所以上去抖抖。上面有得上網，不過通常冇晒位，有長凳同梳化可以訓，仲有地方沖涼添。
抖咗一陣再去食個韓式早餐
等上機啦
由首爾飛兩個半鐘就到札幌，喺機上外望，嘩，大地上白色一片啊。
今次嚟到新千歲機場同上次唔同晒，國際線大樓裝修過又大咗啲，而且可以直接同國內線大樓連接，過咗海關出到入境大堂，沿著呢條通道直行就會去到國內線大樓，JR車站同租車公司counter都喺國內線大樓，如果想去多啦A夢樂園，可以坐扶手電梯上去上一層，即係三樓。
國內線大樓呢邊有好多商店，再加埋三樓多啦A夢樂園，如果要行半日都可能唔夠。
新千歲空港嘅商店留返走果日先行，而家先坐JR去札幌。JR駅喺國內線大樓地底B1F層，但唔係部部lift都可以去到B1F層，亦唔係每部扶手電梯都可以連接B1F層。呢部喺正大堂中央嘅lift可以去B1F層，但因為位置太當眼，好多人用呢部，而人人都推住行李車，所以我哋都排咗好耐隊先搭到。
初嚟步到對新千歲機場環境唔熟嘅情況下，真係好難揾到另一條路落去JR站。不過，今年7月再到北海道嘅時候，因為有唔少時間留喺新千歲空港，所以有時間摸熟呢度嘅環境，下面介紹一下由國際線入境大堂去JR火車站嘅路線，同埋可以去到B1F層的各部升降機同扶手電梯位置，等好似我哋呢次咁初到新千歲機場嘅朋友可以參考下。
國際線入境大堂喺二樓，出到入境大堂沿通過直行就係國內線大樓，而國內線大樓二樓係國內線嘅出境大堂，同埋有好多售賣北海道特產同手信嘅商店。
下圖將二樓國內線大堂嘅平面圖放大一啲，圖上面紅色圈標示嘅位置就係可以去到B1F層嘅三部升降機，其中中間果部就係上面見到喺大堂中央好多人搭果部，而左右兩部因為位置唔顯眼，少人知所以搭嘅人少啲。另外，藍色圈標示嘅位置係可以去到1F層再轉去B1F層嘅兩部扶手電梯，如果搭唔到lift用呢兩部扶手電梯都可以。
下面呢張係國內線大樓1F層平面圖，可以見到1F層被一條弧形行車道分開咗成兩部份，上面弧形果部份係國內線入境大堂同埋租車公司counter，而下面果部份係停車場。只有入境大堂果度先有扶手電梯連接JR火車站，所以係二樓見到嘅扶手電梯，只有上面張圖藍色圈標示果兩部可以去到國內線入境大堂，其他扶手電梯雖然都可以去到1F層，但就連接唔到可以去到B1F層嘅扶手電梯。
註：新千歲空港各樓層嘅詳細平面圖可以參考呢度。
如果坐扶手電梯去B1F層，會先經過呢個國內線入境大堂，面積唔係好大。
再轉呢個落去B1F層嘅扶手電梯
再一直行就係JR駅
JR新千歲空港駅出入口
出入口旁邊有自助售票機
再過阻離係人手售票
由新千歲空港到札幌嘅指定席車票，1,380yen。
旁邊仲有呢個JR Information Desk，專for外國旅客，可以喺呢度出示護照攞返張免費上網卡，不過其實出發前已經用Apps攞咗user id同password，唔使再攞呢張上網卡，只係攞呢睇下。想了解多啲關於NTT東日本免費上網卡點用同點樣用Apps預先攞user id同password，可以參考呢篇文章介紹。
坐火車去札幌中…
雖然唔係第一次見到落雪，但咁大雪嘅環境就係第一次，所以係街度行路都要特別小心翼翼。
喺便利店買咗呢種防滑鞋套，不過因為經常又著又除好麻煩，用幾次之後就冇再用。如果想買記得睇多幾間便利店，因為每間便利店賣嘅款式唔同，價錢都相差幾遠。
呢間札幌三井花園酒店就係頭兩晚喺札幌住嘅酒店，詳細介紹可以睇返呢篇文章。
北海道嘅冬天好早就天黑，係酒店check-in完雖然只係3點幾，但4點落返街個天已經黑晒，所以第一日冇去其他地方，只喺札幌駅行下。
喺北海道嘅第一餐，去咗呢間鰻魚飯好出名嘅老店宮川本廛食。
Day 1完，返回《2014年聖誕節北海道賞雪之旅》總目錄
相關文章：
如果喜歡這篇文章，請點個「讚」吧！