2015年韓國首爾+釜山賞櫻之旅 – 序篇

最近更新日期：2015-11-08 | 文章分類：2015年韓國首爾+釜山賞櫻之旅

旅遊教室» 遊記» 2015年韓國首爾+釜山賞櫻之旅» 2015年韓國首爾+釜山賞櫻之旅 – 序篇

除咗日本之外，韓國係第二個熱門嘅賞櫻地方。韓國雖然面積唔大，但南北地區櫻花嘅開花時間有一定差距，所以如果想喺短短七、八日嘅旅程中既睇到首爾盛開嘅櫻花，又見到釜山嘅櫻花滿開，真係有D難度。所以今年(2015年)復活節嘅韓國首爾+釜山賞櫻之旅，只能作出取捨。

位於南部釜山附近嘅鎮海係韓國最著名嘅賞櫻聖地，所以呢次旅程嘅重點係鎮海嘅櫻花。韓國南部嘅櫻花開花時間比北部早，所以呢次旅程嘅日期就定喺三月尾至四月頭，希望可以遇上釜山、鎮海櫻花嘅滿開時間，而首爾櫻花嘅開花時間比較遲，相信四月頭睇到櫻花盛開嘅可能性唔大，所以首爾只係今次旅程嘅陪襯。

一、行程與遊記

呢次韓國首爾+釜山賞櫻之旅嘅時間只有七日，其中頭尾四日會喺首爾，而中間三日就去釜山同鎮海。各日嘅行程同遊記大致如下：

第一日 – 從澳門飛首爾，到達後已經係下午，所以第一日嘅行程只安排喺明洞行下街Shopping下咁。
遊記：2015年韓國首爾+釜山賞櫻之旅(Day 1) – 明洞行街街、姜虎東食烤肉

第二日 – 第二日嘅行程主要去前幾次到首爾時未去過嘅北村韓屋村遊覽，而其餘時間都係去食好嘢，包括再去土俗村食人參雞，去新村食孔陵一隻雞，同埋去獎忠洞豬腳食每次都會食嘅平安道豬腳。
遊記：2015年韓國首爾+釜山賞櫻之旅(Day 2) – 北村韓屋村、土俗村人蔘雞、孔陵一隻雞、平安道豬腳

第三日 – 釜山嘅行程從第三天開始，上午從首爾火車站坐KTX去釜山，可惜呢日南部嘅天氣麻麻，下午到步果陣釜山不停咁落雨，所以取消咗原先去海雲台嘅計劃，改為喺南浦洞行下街食下嘢。
遊記：2015年韓國首爾+釜山賞櫻之旅(Day 3) – 釜山南浦洞BIFF廣場黑糖餅、富平炸雞

第四日 – 呢次賞櫻之旅喺今天先算係正式開始，因為之前幾天仲未見到過乜嘢櫻花，而今日會由釜山到鎮海參加軍港節櫻花祭，而且亦都順嘔去埋釜山洛東江旁邊嘅掛法櫻花隧道，全日所見嘅都係滿開嘅櫻花，超滿足。
遊記：2015年韓國首爾+釜山賞櫻之旅(Day 4)上 – 釜山掛法櫻花隧道
遊記：2015年韓國首爾+釜山賞櫻之旅(Day 4)下 – 鎮海軍港節櫻花祭

第五日 – 今日要離開釜山返回首爾啦，不過我哋買咗下午嘅KTX車票，所以仲有一個上午可以用，而呢半日嘅行程就係去釜山其中一個賞櫻熱點南川洞，離開釜山前仲去埋札嘎其市場食海鮮。
遊記：2015年韓國首爾+釜山賞櫻之旅(Day 5) – 釜山南川洞櫻花路、札嘎其市場

第六日 – 雖然明知四月頭首爾嘅櫻花未係時候，但今日都仲係決定去首爾嘅賞櫻熱點汝矣島睇睇，之後就到新沙洞行街。
遊記：2015年韓國首爾+釜山賞櫻之旅(Day 6) – 汝矣島櫻花、新沙洞Line Store、醬油蟹

第七日 – 今日返回澳門嘅飛機雖然係下午機，但都冇打算安排行程，喺酒店訓夠，再落明洞食埋個早餐，就芝芝悠悠咁坐機場巴士去仁川機場。
遊記：2015年韓國首爾+釜山賞櫻之旅(Day 7) – 旅程結束

二、住宿酒店

今次七日旅程只係入住兩間酒店。喺首爾入住嘅係Loisir Hotel Seoul Myeongdong，呢間酒店嘅質素算係中規中矩，冇乜特別，但就勝在位置超正，酒店就喺正明洞地鐵站5號同6號出口旁邊，好方便。想了解多D呢間酒店嘅介紹同評價，可以參考之前post嘅呢篇《住@首爾明洞Loisir Hotel Seoul Myeongdong》。