2015年韓國首爾+釜山賞櫻之旅(Day 2) – 北村韓屋村、土俗村人蔘雞、孔陵一隻雞、平安道豬腳

今日嘅行程主要會去一個未去過嘅首爾景點，就係北村韓屋村，其餘行程都係到處食嘢，包括土俗村人蔘雞、孔陵一隻雞同埋平安道豬腳。

出發之前先食咗早餐先。我哋住嘅Loisir Hotel Seoul Myeongdong正門隔離就係Isaac，所以今朝早餐就喺呢度買件三文治企喺街邊食。

今日第一個目的地係去土俗村食人蔘雞，喺地鐵景福宮站2號出口行去路面之後，一直行見到間GS25便利店轉入去就係，好近。

今次招呼我哋入近門口呢間房，有凳坐，唔使屈住腳坐咁辛苦。

都係叫咗例牌蔘雞湯，30,000won。

食完人蔘雞湯，有氣有力可以去有好多斜路要行嘅北村韓屋村啦。為咗保存體力，我咃坐咗一個站地鐵到安國站落車行上去。下面地圖中藍色線係我哋從地鐵站出發，去北村韓屋村再落去三清洞，然後到仁寺洞嘅步行路線。

喺安國站2號出口出嚟之後一直係咁向前行…向前行，就會見到一個唔係咁顯眼嘅北村韓屋村入口。

北村韓屋村有八景，最主要嘅係第六景，其他景都冇乜特別。

第八景係連接北村同三清洞嘅一條石級，可以從呢度落去三清洞，唔使走回頭路。

三清洞有唔少小型商店，都好啱行街shopping。

行下行下唔覺唔覺已經去到仁寺洞

喺仁寺洞好多時都會遇到呢D著住韓國民族服裝嘅表演隊伍

仁寺洞呢檔糖餅真係超好味，每次嚟親都一定要食返件。檔口位置就喺下面地圖紅圈的行人路，不過唔係日日有開。

行完仁寺洞係時候要食下一餐，呢餐去食孔陵一隻雞。孔陵一隻雞喺梨大站同新村站中間，喺邊個站落都可以，我哋係由梨大站行過去。

唉，只係得韓文餐牌？！哦，原來另一邊仲有個寫中文嘅。

我哋食嘅呢個係19,000won嘅一隻雞，不過孔陵一隻雞只係D醬得，雞就麻麻，雞冇雞味。

食完順路去弘大又行下

跟住又係食，呢餐係去獎忠洞豬腳街食豬腳。我哋去嘅係平安道豬腳家，每次嚟首爾都有去，由東大入口站3號出口行出去轉個彎就到。

一盤豬腳兩個人食啱啱好，盛惠31,000won。

Day 2 完，返回2015年韓國首爾+釜山賞櫻之旅目錄。

相關文章：

• 住@首爾明洞Loisir Hotel Seoul Myeongdong
• 住@首爾明洞天空花園酒店
• 住@首爾明洞王子酒店
• 住@釜山Hotel Aventree Busan(亞雲樹酒店)
• 首爾明洞酒店推介
• 韓國外國人專用火車通行證KR Pass
• 韓國MobilePOP Pocket WiFi Router使用分享
• 如何網上預約首爾昌德宮秘苑導賞團門票