2015年韓國首爾+釜山賞櫻之旅(Day 1) – 明洞行街街、姜虎東食烤肉
今次去韓國嘅主要行程，係去釜山同鎮海睇櫻花，所以三月尾出發，一來想避開四月復活郵假期嘅人潮，二來三月尾四月頭預計係釜山櫻花滿開嘅時間。
自從Air Macau每日增加咗一班飛首爾嘅航班之後，唔使再坐零晨機去，返嚟果陣亦唔使天未光就入機場，真係舒服好多。
澳門機場內嘅復活節裝飾
入閘前先食返個M記早餐
去到韓國係當地時間下午2點幾
今次係MobilePOP租左部WiFi蛋，要喺仁川機場攞機，所以到步後先上去離境大堂嘅指定位置攞機。關於MobilePoP WiFi蛋嘅詳細介紹可以睇返我之前已經Post嘅呢篇《韓國MobilePOP Pocket WiFi Router使用分享》。
攞完WiFi蛋喺機場仲有一件事要做埋，就係去地下Korail嘅Travel Center換張KR Pass同埋出定之後去釜山嘅KTX車票。今次都係第一次坐KTX同埋買KR Pass，有關呢方面嘅經驗之前已經寫咗呢篇《韓國外國人專用火車通行證KR Pass – 網上購票與換票教學》同大家分享。
本來諗住出完KTX車票就返上一樓搭機場巴士去明洞，點不知俾counter出飛個姐姐sales我哋買呢種A’REX火車票加的士嘅套票，一時耳仔軟就買咗啦，之後計返先知唔抵。呢個套票每位12,000won，包括一張由仁川機場到首爾站嘅A’REX火車票，同埋由首爾站去酒店嘅的士。如果你住嘅酒店冇機場巴士到又距離首爾站比較遠，咁買呢個套票都抵，如果唔係呢個套票真係唔值得買囉。我哋間酒店距離機場巴士站好近，坐機場巴士比咁樣轉車方便好多，而且坐機場巴士每人只係10,000won，如果用埋呢張1,000won折扣券，只需要9,000won，平佢足足3,000won架。
A’REX火車
出閘
火車到首爾站出閘之後，會見到呢個counter，喺呢度通知職員等佢call的士司機，好快就會有司機過嚟接。架的士係停喺呢層嘅停車場，所以唔需要行出地面。
今次喺首爾住呢間酒店叫Loisir Hotel Seoul Myeongdong，位置真係好正，質素就普普通通過得去咁。詳細介紹同評價可以睇返呢篇《住@首爾明洞Loisir Hotel Seoul Myeongdong》。
係酒店Check-in完都已經係4點幾鐘，因為中午都仲未食過嘢，呢個時候當然要先醫肚先啦，所以行程第一站係喺明洞搵嘢食。
呢餐係食安東醬油粉絲雞，一碟粉絲雞兩個人食，盛惠19,000won。
食完嘢都已經係5點幾，去唔到其他地方唯有喺明洞行下街。
原來中國大使館就喺明洞購物區，之前都冇留意到，今次因為酒店間房對正大使館所以先知道。
中國大使館旁邊條小路有幾間兌換店個Rate好似都幾抵，如果唔夠won使可以嚟呢度換。
喺明洞Young Plaza地下果層都有個細細地嘅Line Store，大間D果間喺新沙洞。
頭先四點幾先食完中午，未有肚食正餐，所以先喺明洞掃下街先。
晚飯時間到啦，不過都已經係夜晚10點嘅事啦，呢餐食姜虎東烤肉。
原來門口有大膠袋可以俾你裝住褸同衫之類，咁就唔怕食完成身油煙味啦。
姜虎東最好味係豬肉，牛肉就麻麻，今晚錯手點多咗牛肉添。兩個人食到飽，賣單55,600won。
下面張地圖紅圈標示嘅係今日去嘅兩間食店，安東醬油粉絲雞同姜虎東烤肉。
食完晚飯仲有一件事要做埋先返得酒店，就係去買張T-Money，張卡事但入去一間便利店都有得賣，價錢間間都一樣，2,500won。不過張卡有唔同設計，搵咗幾間都係得呢款design。
買咗T-Money之後仲未用得，因為裡面冇餘額，要喺地鐵站嘅增值機增值之後先可以用嚟搭地鐵，除左首爾地鐵之外釜山地鐵都用得架。點增值？其實冇乜特別，度度嘅儲值卡增值方法都一樣，識用八達通冇理由唔識用T-Money。
Day 1 完，返回2015年韓國首爾+釜山賞櫻之旅目錄。
相關文章：
- 住@首爾明洞Loisir Hotel Seoul Myeongdong
- 住@首爾明洞天空花園酒店
- 住@首爾明洞王子酒店
- 住@釜山Hotel Aventree Busan(亞雲樹酒店)
- 首爾明洞酒店推介
- 韓國外國人專用火車通行證KR Pass
- 韓國MobilePOP Pocket WiFi Router使用分享
- 如何網上預約首爾昌德宮秘苑導賞團門票
你好, 我想請問張機場巴士1,000won折扣券可以幾多人用?
一張折扣券可以俾一個人用, 所以如果有2個人坐車, 就要有兩張折扣券, 2個就三張, 如此類推.
我5月去了一次首爾和釜山 一直都好懷念 再睇埋你遊記 好想計劃下明年3月尾4月頭去睇櫻花
過多2星期我出發泰國和不丹呀 好期待呀
好耐冇見啦, 去不丹, 正啊. 我都想去. 等你去完睇下你D遊記啦.