2014年環瀨戶內海自駕遊(Day 8) – 黑門市場
每次大阪之旅嘅最後一日總係去黑門市場，感覺開始有D悶，不過都冇法，因為返澳門班機係下午2點機，朝早唔想太趕去較遠嘅景點，所以次次都係去黑門市場買D生果返去，希望下次改變一下啦。
今次住難波東方酒店距離黑門市場近好多，行過去3分鐘都唔駛就到。
好多人都中意係黑門市場食嘢，我地就好少咁做，因為覺得呢度食店麻麻，不過今日未食早餐，所以都試下係呢間好多人食嘅食店食早餐，不過味道真係只屬一般。
其實黑門市場買生果來來去去都係去呢兩間較大嘅商店
今期係士多啤梨當造
桃都唔錯
仲有巨蜂提子
西瓜都好沙喎
仲有密瓜，真係唔知買邊樣好。
呢D都唔錯喎
買生果嘅時候見到呢隻好可愛嘅狗狗，不過每次同佢影相佢都會擰轉面，好有狗明星嘅脾氣啊。
中午臨走前本黎想食返次自由軒嘅咖哩飯，不過好多人排隊，只可放棄。
最後去左難波東方酒店對面呢間三田製麵所
麵嘅食法有D怪，每次食嘅時候將要食嘅麵浸落湯再食，不過重點唔係食法問題，而係味道唔好食，食左一半已經唔想再食落去啦。
係時候去機場啦，由難波東方酒店去南海電鐵嘅難波車站只需要2-3分鐘，今次唔駛拖住行李行咁長路啦。
或者好多人都已經知道，不過今日冇咩寫，呢度就用D篇幅講一講難波車站連接月台同地下嘅升降機位置啦。南海電鐵嘅月台係位於難波車站嘅三樓，從三樓落去地下，又或者從地下上去三樓，每層都有扶手電梯，所以基本上就算有行李都冇問題，不過如果想坐升降機直上都有辦法。
以下係從地下面對0101的北面入口行去升降機的路線
右邊扶手電梯可以上去三樓月台，如果要坐升降機，就唔好上扶手電梯，繼續向前行。
沿住地下條黃色導盲線行就會去到呢個有升降機標示嘅指示
轉入去會見到一排locker，行到盡頭，一邊係去swissotel Nankai Hotel，另一邊就係升降機。
升降係三樓嘅出口，旁邊有一間uniqlo，然後就係出入閘口，再過去就係售票處。
由大阪入去機場都係坐返呢隻特急ラピート(rapit)列車
大阪去關西空港車程大約35分鐘，係車度食埋呢兩件甜品先。
又黎返第一日坐火車入大阪嘅車站
行過天橋就係Terminal 1
Check-in之前先去地下入境大堂南面嘅宅急便收件處寄返今次旅程中租嘅WiFi Router。
過海關啦
候機室
買盒朱古力上機食，為今次旅程劃上完美句號。
– Day 8 完 (全篇完) –
返回遊記主目錄 >> 2014年環瀨戶內海自駕遊 – 序章
往年日本關西遊記：
如果喜歡這篇文章，請點個「讚」吧！