2014年環瀨戶內海自駕遊(Day 7) – 大阪新地標：阿倍野Harukas 300展望台
六日嘅自駕行程今日結束啦，從赤穗溫泉返去大阪大約兩個鐘車程，中途唔會去其他景點，所以今日大部份時間會係大阪，而今日係大阪主要會去一去係天王寺新落成有六十層樓高嘅阿倍野Harukas 300展望台。
起身之後先到露台睇下海景先
跟住就去食早餐啦，食早餐之前當然有再浸多次溫泉啦。
起程返大阪啦
中途係休息站見到有呢種自助咖啡機，入左錢選擇左想要嘅咖啡之後，等2分鐘就會沖好一杯熱咖啡出黎架啦。
好快又黎到最怕行嘅大阪環狀線啦
返到大阪先去一個新景點，就係座落係JR天王寺駅對面近鐵阿倍野橋總站上蓋係今年三月落成嘅阿倍野Harukas大樓頂樓嘅阿倍野Harukas 300展望台。300代表展望台離地面300米，足足有60層樓高，係大阪最高嘅建築物。
阿倍野Harukas本身有停車場，不過full左，我地泊左係對面Q’s Mall個停車場。
Q’s Mall旁邊就係Hotel Trusty Osaka Abeno
對面就係阿倍野Harukas
幾座大建築物由行人天橋相連
過左天橋就會見到上去Harukas 300展望台入口嘅電梯大堂，不過唔好心急入去住，因為買飛嘅售票處唔係上面，而係係行天橋呢層嘅商場入面。
阿倍野Harukas大樓地下幾層係近鐵百貨，呢個係行人天橋呢層嘅平面圖，Harukas 300展望台嘅售票處就係百貨公司北面入口。
沿天橋行過去就係百貨公司北面入口
呢個就係北面入口
一入去就會見到售票處架啦，不過呢度只可以買到當日嘅入場券，如果想買往後日子嘅入場券，可以睇下官網介紹。
超多人排隊買飛
當日入場券嘅價錢係1,500日元
買左入場券可以去返頭先個電梯大堂坐電梯上去入口大堂啦
呢幾部電梯唔係直接上去Harukas 300展望台，只係坐到去位於16樓嘅入口大堂，所以就算冇入場券一樣可以上去架。
呢度就係展望台嘅入口大堂
係呢層有一個空中花園，比起梅田大阪駅上面JR大阪三越伊勢丹9樓個空中花園仲高幾層，如果唔打算買飛上去Harukas 300展望台都可以淨係上黎呢層睇下架。
上去Harukas 300展望台嘅電梯係呢度過去
A果邊先係去上Harukas 300展望台嘅電梯口，B果邊係如果提早買左換票券去換當日入場券嘅地方。
如果提早買左指定日子嘅換票券，就要黎呢個counter換當日入場券，亦可以係呢度買以後日子嘅換票券。
因為新開冇幾耐，當日上去展望台嘅日本遊客好多。
上去展望台嘅電梯只有兩部，不過好在係高速電梯，而且每部可以入到好多人，所以等嘅時間都唔算好耐。
電梯嘅速度配合埋電梯槽內嘅燈光，好有cyber效果。
一陣間就由16樓去到60樓
呢度就係最高嘅60樓距離地面300米嘅Harukas 300展望台啦
展望台可以360度從不同方向睇晒成個大阪
有幾塊玻璃會標示望出去嘅地標
有膽量可以行上玻璃地板望下腳底嘅地面
有興趣可以搵專人影返張相，當然係要收費架啦。
從展望台一邊望向另一邊
除左60樓之外，樓下仲有兩層都係，其中59樓係手信店同搭電梯落返樓下嘅地方，而58樓係食野嘅地方，同埋有個大平台。
落去一樣要排隊
16樓有扶手電梯連接樓下嘅食肆層，先落黎食午餐。
今日選擇食呢間好出名嘅竹葉亭饅魚飯
呢間新開嘅近鐵百貨真係超大，一場黎到冇理由唔行下架，所以食完飯先係度行下先。最後係度買到第一日係心齋橋見到想買但因為冇退稅而冇買到嘅Samantha袋，呢度有退稅，不過退稅嘅office唔係咁好搵，好彩搵到個職員帶我地過去。
離開天王寺之後先去左酒店Check-in，之後再開返架車去租車店還車。今晚都係住係難波、心齋橋一帶，不過今次想住近D難波車站，所以book左難波東方酒店，方便聽日坐南海電鐵去機場，同埋聽朝行過去黑門市場都近D。酒店介紹可以參考呢篇：住@大阪難波東方酒店(Namba Oriental Hotel)。
還車之後落黎嘅時間就係係難波同心齋橋行街shopping啦
雖然覺得蟹道樂冇以前咁好味，但係每次去大阪都總有一餐係食佢。
– Day 7 完 –
返回遊記主目錄 >> 2014年環瀨戶內海自駕遊 – 序章
↓ 在Google地圖上查看今日行車路線和景點 ↓
往年日本關西遊記：
如果喜歡這篇文章，請點個「讚」吧！