2014年環瀨戶內海自駕遊(Day 6)下篇 – 廣島賞花行(下)：世羅高原農場郁金香、岡山縣和気町藤公園
上一篇講到係廣島縣世羅町遊覽左花夢之里同せらふじ園，仲係せらふじ園入面食埋田園燒烤。呢篇繼續睇埋食完午餐之後去嘅第三個景點世羅高原農場，同埋係岡山縣嘅和気町藤公園。
世羅高原農場距離せらふじ園亦唔係好遠，開車過去好快就到。[GPS設定：電話0847-24-0014]
農場出面都有免費停車場，從車輛數目黎睇，黎呢度嘅人比前兩個景點多好多喎。
世羅高原農場入口
呢度嘅入場費都係800円
世羅高原農場係唔同季節會種植唔同嘅花卉，例如春季(4月中~5月中)會種郁金香，而夏季(8月)就係向日葵，所以今次我地係度睇嘅係郁金香。
呢度嘅郁金香唔只可以係度睇，仲可以買返屋企種架。
原來呢度都一樣有燒烤食
農場裡面仲有小賣部
世羅高原農場面積唔細，全個農場種晒郁金香，一排排唔同顏色嘅郁金香，望落去真係好壯觀啊。
雖然唔捨得，但係遊覽完世羅高原農場真係要同廣島講拜拜啦。由世羅町去今晚住宿嘅赤穗溫泉要2個半鐘車程，不過我地中途仲要去多個景點，就係距離赤穗冇幾遠係岡山縣嘅和気町藤公園。
世羅町道路
上高速公路
和気町係一個鄉下地方，係山陽自動車道嘅和気IC離開高速公路之後再行冇幾耐就到。不過呢度D鄉下小路比較狹窄，地方亦比較難搵，不過只要相信GPS跟住行就可以去到。[和気町藤公園GPS設定：電話0869-92-1135]
呢度個停車場真係好大，當然亦係免費啦，不過點解冇乜車係度既？
由停車場行過去小河對岸就係和気町藤公園，唔係間水過去，後面有條橋架。
根據官網講呢度每年4月尾至5月頭開催期間應該係好熱鬧架喎，點解D攤販都冇營業？
藤公園旁邊係一間叫和気町神社嘅小型神社
過河小橋
呢度就係和気町藤公園啦
下，唔怪得人影都冇個啦，原來我地黎遲左，D花已經開始散落啦，仲點會有人黎。
不過就算係散落，都仲要用300yen買入場券先入得去。
雖然話和気町藤公園係西日本最有人氣嘅紫藤公園，但過左盛開期就變得好失色啦，D紫藤花已經冇晒光澤，好沈色，同前日係大三島藤公園同今日係せらふじ園睇嘅差別好大囉。
正所謂希望越大失望越大，本黎對和気町藤公園寄予厚望，以為會係呢度見到今次旅程中最靚嘅紫藤花，可惜時間唔啱，不過都算啦，之前果D都已經好靚，應該滿足。
係和気町藤公園只係逗留一陣，結束今日遊覽行車開車去赤穗溫泉嘅旅館啦。由和気町去赤穗雖然唔遠，但係都要行差唔多45分鐘車先到架。
赤穗溫泉屬於兵庫縣
赤穗係一個小型工業城市，而赤穗溫泉就係呢個城市海邊，呢度唔算係好出名，溫泉旅館數目亦唔係好多，之所以係呢度過夜，係因為行完三個景點之後唔夠時間直接返大阪，而且又想再住多晚溫泉旅館，而赤穗溫泉正好係返大阪嘅路上，既可以作為中途站，又滿足到浸溫泉嘅要求。雖然赤穗溫泉唔係好出名嘅溫泉鄉，不過由於位於海邊，可以望住瀨戶內海浸溫泉都幾爽架。
呢間就係我地入住嘅溫泉旅館，叫銀波莊，詳細介紹可以參考呢篇住@赤穂温泉 夕映えの宿 銀波荘。
房間對住瀨戶內海，仲有個大露台，日出日落都可以睇到，只可惜日出果陣仲見緊周公。
銀波莊最正嘅係佢嘅溫泉
今晚晚餐，食完飯浸下溫泉就覺覺豬啦。
– Day 6 完 –
返回遊記主目錄 >> 2014年環瀨戶內海自駕遊 – 序章
↓ 在Google地圖上查看今日行車路線和景點 ↓
往年日本關西遊記：
很细微详尽的游记，对我十一月去大阪周边游的帮助很大。谢谢楼主！???
請問世羅高原農場有沒有巴士可以去到?
沒有公共交通工具可以去到, 只有坐taxi或者自駕.