2014年環瀨戶內海自駕遊(Day 4)下篇 – 大三島藤公園
由四國松山去廣島有兩種方法，第一種方法係行水路坐汽車渡輪由松山港到廣島港，第二種方法是行陸路經瀨戶內海上嘅西瀨戶自動車道到本州，再行山陽自動車道到廣島。基本上兩種方法用嘅時間差唔多，大約要2個半至3個鐘，而我地就選擇後者，從陸路行高速公路去廣島。
行陸路除左因為費用計落比坐汽車渡輪平D之外，最重要係因為我地要去一個叫大三島藤公園嘅景點。
西瀨戶自動車道係四國呢邊嘅起點係今治市，由松山去今治比較近嘅路有317號國道同196號國道兩條路可以行，因為317號國道距離稍為短D，所以GPS選擇左317號國道，不過317號國道大部份路段係山路，上山落山再加上路面較窄，行起黎比較辛苦，所以如果大家日後有機會由松山去今治，建議選擇行196號國道，因為196號國道係起係海邊嘅公路，好行好多，而且距離亦只係多5至6公里。
食排四國限定嘅柑味KitKat補充下體力先
終於黎到係今治嘅西瀨戶自動車道入口
入左西瀨戶自動車道冇幾耐就會去到呢個來島海峽休息站，呢度可以睇到來島海峽嘅風景，順便係度食埋晏。
今日嘅午餐
食完飯繼續起程啦。呢條西瀨戶自動車道係由瀨戶內海上面六個大島連接而成，島與島之間有橋相連，有長有短，一邊行一邊可以欣賞瀨戶內景色，真係唔錯。西瀨戶自動車道亦叫做しまなみ海道(瀨戶內島波海道)，係高速公路兩邊設有單車道，係日本著名嘅單車旅遊路線，唔少外國人都會專登去呢度踩單車架。
我地要去嘅大三島藤公園位於其中一個叫大三島嘅島上，話咁快黎到出口啦。
離開高速公路之後大約行多7-8公里就到公園
大三島藤公園本身冇電話，所以GPS可以set公園旁邊嘅大三島美術館電話0897-82-1234，公園旁邊有個免費停車場。
我地黎呢日已經係五月頭，應該比盛開期過左一個星期左右啦，不過都仲好靚，未有掉落嘅情況。公園佔地面積唔係好大，大約有10幾個種紫藤嘅棚，最緊要一樣嘢係完全免費，只係呢度冇巴士到，要黎一係自駕，一係踩單車。可能啱啱過左黃金週假期，呢日公園裡面包埋我地只係得6個人，冇人阻住影相都爽D。
遊覽完大三島藤公園係時候要起程去廣島啦，從大三島到廣島市中心差唔多仲有120公里，連埋休息要兩個鐘先到架。
頭先上返高速公路之前唔記得去油站入油，攪到唔夠油捱到去廣島市區，唯有搵個有油站嘅休息站入油順便休息下。原來係休息站度嘅油站油費同出面差唔多，不過如果要係休息站嘅油站入油，最好等到休息完要入返高速公路之前先去入，因為係油站入完油駛出去就係要行去高速公路嘅單程路，如果想駛返轉頭返去休息站會有D危險。
入到廣島市區仲未天黑
不過去到酒店已經天黑啦，先係酒店附近呢間公眾停車場泊好架車，因為會係廣島住兩晚，而聽日唔打算開車，改坐電車，所以架車會泊係度兩晚一日。
係廣島住兩晚嘅酒店廣島華盛頓酒店，呢間酒店新開冇耐，質素同位置都好好，想睇酒店介紹可以參考返呢篇住@廣島華盛頓酒店(Washington Hotel Hiroshima)。
酒店附近係廣島市最主要嘅購物區，入夜之後都仲好熱鬧，當然唔可以用大阪心齋橋呢D黎比啦。
今晚搵左間拉麵店食拉麵，味道唔錯架。
食完野再行多陣街
最後買D糕點返酒店做宵夜
– Day 4 完 –
返回遊記主目錄 >> 2014年環瀨戶內海自駕遊 – 序章
↓ 在Google地圖上查看今日行車路線和景點 ↓
往年日本關西遊記：
感謝您的分享，不過藤公園旁似乎不是美術館，應該是神社?
從google地圖上看, 藤公園的西邊有一間美術館, 南邊有一間神社.