2014年環瀨戶內海自駕遊(Day 4)上篇 – 道後温泉本館、松山城
我地係四國只係停留短短兩日，今日會離開四國前往廣島。由松山去廣島市大約有180幾公里，中間會先去松山松，之後再到瀨戶內海上嘅大三島上嘅大三島藤公園睇下盛開嘅紫藤，最近先到廣島市內酒店Check-in。
一早起身浸完溫泉就去食早餐
食完早餐未Check-out住，先行過去溫泉旅館旁邊嘅道後温泉本館參觀下。
道後温泉本館係一個歷史悠久嘅公眾溫泉浴場，仲係對外營業緊，裡面有兩個溫泉浴場，分別係神の湯同霊の湯，想入去參觀最佳嘅方法是買飛入去浸溫泉，入場費分四級，分別係410円、840円、1,250円同1,550円。410円只可以淨浸溫泉(神の湯)，不可以用休息室，亦冇毛巾同浴衣供應，而且亦唔可以參觀天皇用過嘅又神殿，不過就可以參觀館內其他地方。840円除左可以係神の湯浸溫泉外，仲可以用二樓神の湯休息室，可以借用浴衣，不過都係冇毛巾供應，但就可以參觀全館，包括又神殿。1,250円可以係霊の湯浸溫泉，同埋可以用二樓霊の湯休息室，亦可以借用毛巾同浴衣，當然可以參觀包括又神殿在內的全館啦。最貴嘅1,550円基本有齊所有野，而且係三樓仲有專用嘅個室休息室添。
如果唔想浸溫泉，亦可以淨係入去參觀，入場費250円，我地就只係買飛入去參觀。
道後溫泉本館正門入口，入去之前要除鞋，大門度有多個locker可以用黎存放鞋同雜物。
入口之後嘅走廊
有興趣可以買呢度出品嘅浴衣、毛巾之類做紀念品
入到去會先由專人帶你去參觀天皇用過嘅又神殿，而且會有講解(當然係只得日文啦)，不過係又神殿裡面唔俾影相。之後就係自由參觀嘅時間，其實可以參觀嘅地方主要係得三樓一間房。
館內地方狹小，所以樓梯同走廊都好窄。
上到三樓行到走廊盡頭有一間好似展覽室嘅客戶
其他地方因為有客人使用中，不便影相啦。
參觀完道後溫泉本館，再行多次溫泉街順便買D手信。
溫泉街上賣用物嘅手信店唔多，最大間係呢間。
柑係愛媛縣特產，所以呢度D果子都有用柑做嘅，而且外型同包裝都做到好似真柑咁。
其他柑味產品
最後買D用魚肉做嘅小食食下，不過味道一般。
我地住嘅大和屋本店可以去到中午12點先Check-out，比一般溫泉旅館要10點Check-out晏好多，不過我地都唔需要等到12點，大約11點左右就Check-out走人，跟住仲要去埋松山城。
松山城係松山市嘅市中心，距離道後溫泉不足2公里，開車幾分鐘就到。
街上行駛嘅電車
松山城有幾個入口，最方便係從東邊嘅東雲口坐登山纜車上去。係登山纜車車站隔離街有一個官方嘅收費停車場，我地就係將架車泊係呢度，不過其實係附近橫街有幾個小型時租停車場，計落泊車費仲平D，而且仲近D纜車站。
泊好車跟住指示牌行一陣就可以去到纜車站
纜車車飛係採用自助售票方式發售，不過旁邊有位著古裝嘅姐姐指導。
係呢位姐姐嘅指導下，話咁快就買好飛，來回500円。
松山城模型
松山城嘅武士吉祥公仔
坐車地點係車站二樓
呢條纜車道有兩款車，一款係纜車，另一款係呢種吊椅，張車飛兩款車都可以上得，有膽心嘅當然要坐吊椅啦，而且唔洗等車，即時坐上去就走得。
其實呢款吊椅好安全，離地面唔係好高，而且仲有圍網就算真係跌左落去都可以彈返起，冇事。不過呢款吊椅速度超慢，坐上去只是開頭幾分鐘覺得好玩，之後就超悶，唔怪得迎面而來果D人個個低頭玩手機。
另一款就係呢種纜車，速度快好多，不過每10幾分鐘先有一班車。
從纜車站仲要行一段斜路先會去到松山城
上到去可以遠眺松山市景色
松山城係一個咁colorful嘅武士公仔襯托下，感覺好卡通。
如果要入城參觀需要另外俾錢
纜車站附近有一間專賣今治出產嘅毛巾產品嘅商店，離開四國前係呢度買D今治毛巾先。
– Day 4 未完，待續 –
返回遊記主目錄 >> 2014年環瀨戶內海自駕遊 – 序章
↓ 在Google地圖上查看今日行車路線和景點 ↓
往年日本關西遊記：
如果喜歡這篇文章，請點個「讚」吧！