2014年環瀨戶內海自駕遊(Day 3)上篇 – 高松栗林公園
今日會去兩個主要景點，一個係高松市內嘅名勝栗林公園，另一個係座落係香川縣琴平嘅四國著名景點金刀比羅宮，之後就會到四國名湯道後溫泉住返晚浸溫泉。
香川縣最出名嘅係烏冬，所以當然要食下啦，今朝早餐就照旅遊書教路，去左搵呢間叫松下製麵所嘅平民街坊烏冬店。間舖係離栗林公園冇幾遠嘅小區，位置可以參考呢度。
如果開車過黎可以泊佢嘅專用駐車場
間舖頭地方好細，大約只係可以坐到10個人，應該係做街坊生意，不過有好多同我地一樣攞住旅遊書搵到黎嘅日本人，睇黎呢間野係日本國內都很出名下。
呢間野採用半自助形式，要自己落手煮烏冬，幾得意。首先同店員講要幾多碗烏冬，跟住自己將烏冬倒入個兜放入熱湯度整熟佢，不過其實D烏冬已經熟左大半，只需要係咁意整熱佢已經可以。之後可以按自己喜好加溫泉蛋、天婦羅同其他配料，溫泉蛋同天婦羅係逐件計錢架。
自己落手落腳整嘅感覺特別美味，記得一定要食佢嘅溫泉蛋，好好味架。
食完要自己將碗、筷子同垃圾分開放入膠箱，同埋離開前記得俾錢啊。
食飽飽開始今日嘅行程啦，係高松市我地只會去栗林公園一個景點。如果係自駕，可以泊係東門駐車場(電話號碼：087-833-7411)。
栗林公園正門
入場前先買張門券
栗林公園面積好大，官方將公園劃分出南、北兩條遊園路線，分別需時60分鐘同40分鐘，南面條路線景色比較靚，我地只係行左南線。
東門停車場旁邊有一間叫栗林庵嘅手信店
係度買左兩件栗子做嘅糕點，不過味道麻麻。
– Day 3 未完，待續 –
返回遊記主目錄 >> 2014年環瀨戶內海自駕遊 – 序章
↓ 在Google地圖上查看今日行車路線和景點 ↓
往年日本關西遊記：
如果喜歡這篇文章，請點個「讚」吧！