2010年秋日本中部自駕遊 – Day 4：宮川朝市、櫻山八幡宮、飛騨古川、誤闖雪山

今日嘅行程會先係高山遊覽宮川朝市同陣屋朝市，然後再到櫻山八幡宮，之後離開高山到飛騨古川，再經白川鄉到富山市過一夜。而係今日嘅旅程中，我地仲遇到一件驚險嘅事：誤闖雪山。想知有幾驚險，睇埋落去。

尋日日間嘅天氣本來好地地，但夜晚就落起雨黎，好彩到天光雨勢停左，不過氣溫就下降左幾度，可能就係呢個氣溫驟降嘅原因，令到我地今日有落雪嘅遭遇。

朝市當然係要一朝早去啦，先去宮川朝市，從酒店行過去並唔係好遠，6分鐘左右就到。

顧名思義宮川朝市就係宮川旁邊，清早時間並唔係太多人。

行到咁上下先入去呢間食店食個早飯

行完宮川朝市，再去埋陣屋朝市，呢度規模唔大，只有幾個攤販。

顧名思義陣屋朝市旁邊就係高山陣屋

行完兩個朝市，先返去酒店check-out，跟住再去埋櫻山八幡宮。

櫻山八幡宮出面咁啱有個菊花展，順便參觀下。

櫻山八幡宮附近仲有高山屋台會館、櫻山日光館、獅子會館呢D展館，不過吸引力唔大，而且時間有限，所以冇入去參觀，睇完菊花展就開車離開高山去飛騨古川。

飛騨古川離高山市唔夠20公里，開車20分鐘就到。飛騨古川係一個小鎮仔，冇咩遊客，街上好寧靜。

飛騨古川最主要景點就係呢條養左好多金魚嘅小溪

溪入面養左好多魚

如果有興趣喂下魚，可以用100日元自助買包魚糧玩下。

附近有個小寺院

買返串牛內串頂下肚先

中午果餐唔可以只係食串牛肉就算，係附近搵左間小店食碗牛肉飯。

去完飛騨古川我地下一站係計劃順路去埋白川鄉，然後再到富山市。如果要行高速公路，要先行返去高山市，再經高山清見道路同東海北陸自動車道到白川鄉。不過，我地一時貪近唔想行回頭路，選擇左行一條直接連接飛騨古川同白川鄉嘅360號國道。

在較大的地圖上查看360號國道

原來360號國道係一條係高山上嘅小路，條路彎彎曲曲一直爬到上山頂，雖然話係國道，但係條路只夠一架車通過，路嘅一邊係悬崖峭壁，另一邊就係萬丈深淵，旁邊嘅圍欄睇落又唔多穩陣。咁嘅路就算係風和日麗嘅時候都好危險，呢日仲撞正山上落左場初雪，係毫無準備又冇雪地開車經驗嘅情況下，只有硬住頭皮以龜速前進，因為條路實際太窄，想掉頭行返落山都唔得。

最後我地用左個半小時總算行完呢條魔鬼山路落到山下，執返條命。雖然呢程路好驚險，但係山上嘅景色又真係超靚，係呢個半鐘內窗外嘅景色由綠變黃，再變紅，跟住變白，再變返紅，然後再變黃，最後變返綠，一年四季濃縮左係呢個半小時之內，一次過睇晒，超正，只可惜太過驚唔識得影多幾張相。

因為太驚而且山上又凍，落到山下可謂饑寒交迫，第一時間入左間便利店，食左呢世人覺得最好味嘅關東煮。

雖然山下就係白川鄉，但係因為經歷左一程驚險旅程，又耽誤左唔少時間，再加上山下落緊雨，所以決定改一改行程唔去白川鄉住，先去冇咁多嘢睇嘅五箇山合掌之里睇一睇，跟住就去富山投宿。

我地住係富山駅附近嘅コンフォートホテル富山駅前(Comfort Hotel Toyama)，間酒店房間雖然細D，但質素唔錯，而且位置好方便，不過富山市都幾鄉下地方，就算火車站附近入夜之後都冇咩地方好行，食店亦唔多，今晚只係食呢D。

– Day 4 完 –

相關文章：

• 2010年秋日本中部自駕遊 – Day 1：名古屋
• 2010年秋日本中部自駕遊 – Day 2：土岐Premium Outlet、惠那峽
• 2010年秋日本中部自駕遊 – Day 3：遊下呂溫泉合掌村、飛騨の里、高山古並町老街
• 2010年秋日本中部自駕遊 – Day 5：立山駅、美女平、黑部峽谷觀光火車
• 2010年秋日本中部自駕遊 – Day 6：金沢兼六園、近江町市場、金沢21世紀美術館
• 2010年秋日本中部自駕遊 – Day 7：白川鄉
• 2010年秋日本中部自駕遊 – Day 8：長島三井Outlet
• 2010年秋日本中部自駕遊 – Day 9：名古屋城、榮、大須商店街
• 2010年秋日本中部自駕遊 – Day 10：中部國際空港
• 名古屋酒店推介
• 住@名鉄イン名古屋桜通
• 住@スパホテルアルピナ飛騨高山 (Spa Hotel Alpina Hida Takayama)
• 住@下呂觀光ホテル本館
• 住@宇奈月温泉 ホテル黒部 (Hotel Kurobe)
• 日本中部自駕遊必買：外國自駕遊旅客專用的中日本高速公路ETC卡 – Central Nippon Expressway Pass
• 日本Pocket WiFi Router租借服務：主要租機公司介紹和比較
• 日本忍者WiFi九折優惠益讀者