2013年首爾賞楓自由行 – Day 1 (Part 1)：坐真航空澳門飛首爾

上次到首爾旅遊已經係接近四年前嘅事，今年再到首爾好大程度上係陪家人出遊。因為上次坐Air Macau零晨機去清晨機返嘅經歷實在太辛苦，所以今次決定打死都唔坐，改坐真航空，中午機去夜晚機返，唔洗捱眼訓咁辛苦。

係機場攪完check-in手續之後先係機場M記食早餐。

出發期間適逢係賽車週，機場大堂都放置左部方程式俾人影下相。

原來係澳門機場嘅候機室內新開左呢間英國著名百貨公司Harrods嘅手信專門站

候機室展出緊澳門舊照片，個廣告牌都好有型。

我地坐LJ028號航班，12：10出發。

從首爾飛黎嘅飛機啱啱到達，落客加油之後就會載我地飛去首爾。

雖然機票有包20公斤寄艙行李唔需要另外俾錢，亦有簡單飛機餐，不過真航空其實都係屬於廉價航空之列，但係價錢一D都唔算平，最近推出嘅super save特價機票連稅都要2千4百幾澳門幣，而且數量唔多，我地今次買嘅係正常票價，連稅3千2百幾蚊。

我地嘅座位係三十幾行，起初以為好後排，但原來真航空嘅座位編號從28號開始，三十幾行算係前排架啦。真航空嘅座位比較窄，如果閣下係高人，一定會坐得唔舒服。

飛機餐超簡單，一個餐盒，裡面有一件蛋糕，一個包，一條香蕉，一盒布丁再加一杯水，好慳皮。 飛行途中空中服務員都有另外提供水、可樂等飲品。

食完嘢先埋好份入境申報表

窗外景色

由澳門飛首爾要三個半鐘，食完訓陣覺，離到達仲有半個鐘有廣播叫醒大家，一齊跟住空姐做健身操，鬆下骨。航中服務員穿著好casual，裇衫牛仔褲再加一頂鴨嘴帽，好有青春感。

仁川機場接近中…

降落啦

落機之後先坐一程接駁火車

首爾機場過關速度都好快，過關時亦需要打手指模同影張相。過完海關就係攞行李嘅地方，之後排隊出去入境大堂。呢度有銀行換錢櫃位，我地係澳門已經換晒所需嘅韓圜，不過都八卦睇下匯率。係網上好多人都中意到韓國先至換錢，但係我地比較過無論係仁川機場定係明洞嘅銀行同街邊兌換店，兌換率同澳門都差唔多，係韓國換錢並唔會比係澳門換著數。

今次住嘅酒店係位於明洞嘅Hotel Skypark Central Meongdong，坐機場巴士去好方便。出發前已經print左呢隻1000韓圜嘅折扣券。

記得09年果次去係要係入境大廳售票處買飛先可以用折扣券，所以第一時間先係售票處排隊買飛，點知原來而家規矩改左，要係上車時直接俾錢司機先可以用折扣券，唔需要係售要處買飛。

不過要留意司機係冇散紙找贖，上車前要準備好10000韓圜嘅紙幣，司機係收左你嘅10000韓圜紙幣之後，1000韓圜折扣會係一個密封嘅錢箱度吐出黎俾你。另外一張折扣券只可以用黎買一張車票，如果有幾個人，就要列印幾張折扣券啦。

入境大廳機場巴士售票處，如果用折扣券就唔需要去呢度排除買飛。

機場巴士站係入境大廳5號出口同11號出口出面路邊，巴士會先停5號出口出面個站，之後再到11號出口個站，係5號出口巴士站等車易D搵位。

– Day 1 未完，待續 –

相關文章：

• 首爾明洞酒店推介
• 2014年韓國首爾新酒店
• 住@首爾明洞天空花園酒店(Hotel Skypark Central Myeongdong Seoul)
• 住@首爾明洞王子酒店(Prince Hotel Seoul)
• 首爾免費無線上網 (Seoul Free WiFi)
• 2013年首爾賞楓自由行 – Day 1 (Part 1)：坐真航空澳門飛首爾
• 2013年首爾賞楓自由行 – Day 1 (Part 2)：夜遊清溪川首爾燈節
• 2013年首爾賞楓自由行 – Day 2 (Part 1)：土俗村人參雞、遊覽景福宮
• 2013年首爾賞楓自由行 – Day 2 (Part 2)：仁寺洞、平安道豬手
• 2013年首爾賞楓自由行 – Day 3 (Part 1)：南山公園睇紅葉
• 2013年首爾賞楓自由行 – Day 3 (Part 2)：巧遇首爾初雪
• 2013年首爾賞楓自由行 – Day 4 (Part 1)：德壽宮
• 2013年首爾賞楓自由行 – Day 4 (Part 2)：梨大、宏大、東大門批發市場
• 2013年首爾賞楓自由行 – Day 5 (Part 1)：廣藏市場、鷺梁津水產市場
• 2013年首爾賞楓自由行 – Day 5 (Part 2)：明洞購物、景福宮烤肉
• 2013年首爾賞楓自由行 – Day 6 (Part 1)：昌德宮秘院賞紅葉
• 2013年首爾賞楓自由行 – Day 6 (Part 2)：坐首爾機場火車去仁川機場，首爾再見了
• 2009年聖誕首爾之旅