2013年清境、台北自由行 – Day 1 (Part 1)：直飛台中
去年(2012年)六月嘅台灣之旅，本來已經計劃左去清境，入住嘅民宿都已經book好左，點知突然遇上雙颱風夾擊台灣，上清境嘅行程被迫取消。今年再接再厲，又係選擇係六月颱風季節上清境。今次好好彩冇颱風，但出發前卻發生大地震，命苦！
兩次想去清境都遇著天災，係唔係咁唔想我去啊！本來有諗過再次取消清境行程，因為都擔心有餘震，不過如果今次又取消，以後可能會有心理陰影唔敢再提去清境，所以決定唔理咁多，死就死照去啦。
今次我地坐嘅係復興航空，從澳門直飛台中。因為正值端午節假期，所以機場都好多人出行。
飛機起飛時間係中午12點，check-in完先去M記食個早餐先。
12:00準時出發
飛機餐超難食
，好彩已經食左早餐打底。
由澳門飛台中只係個半鐘，話咁快就到。台中機場並唔係好多航班進出，所以周圍靜英英，冇咩人。
入左境第一時間先去申請個iTaiwan免費WiFi帳戶，申請地點就係位於入境大堂呢個旅遊服務中心，一踏入入境大堂就見到架啦。iTaiwan免費WiFi帳戶今年5月先開始俾遊客申請，不過今次旅程都冇乜點用過，申請左只係攞黎傍下身。
Reference: 台灣iTaiwan免費Wifi開放遊客申請
由台中機場出市區，一係坐的士，一係坐巴士。我地當然選擇坐巴士啦，因為平嗎。巴士站係地面果層，按照指示牌向公車候車區行去就係，唔難搵。
我地今次入住嘅酒店係台中公園智選假日酒店，出發前係台中機場網站check過交通資料，由機場坐150路公車可以直達台中公園總站，行100米就到酒店。
台中好多公車都係由統聯客運營運，150路公車都係。公車嘅車費係按段收費，由機場到台中公園總站車費係NT$57。車費係上車嘅時候俾，而且不設找續，如果有悠遊卡亦可以用悠遊卡。不過我地身上冇悠遊卡，又冇散紙，好在係候車室度有巴士司機好好人同我地唱散。
巴士前面有位置可以放置行李，都幾方便。雖然係機場上車嘅乘客唔多，但係入到市區之後就會好多人迫上巴士，所以記得搵個好位坐定定啊。
從台中機場到台中公園正常應該係大約1小時車程，不過台中市區嘅交通都幾繁忙，所以我們用差唔多個半鐘先到達。
巴士嘅終點站係台中公園(雙十路)站，架巴士係呢度停一陣之後就會開返去台中機場。
我地入住嘅台中公園智選假日酒店，距離巴士站只有100米左右，落車之後向住行人天橋方向行，係斑馬線過馬路就係。
今晚停留台中嘅主要目的，係為左第二朝坐南投客運上清境，所以選擇位於南投客運台中總站旁邊嘅台中公園智選假日酒店。
房間面積比預期大，而且好新淨，仲有個大落地玻璃窗對正台中公園，正！
>> Day 1 未完，待續……
Related posts:
- 台北酒店推介(Part 1) – 西門町附近10間精選酒店住宿推薦
- 台北酒店推介(Part 2) – 台北車站附近10間精選酒店住宿推薦
- 台北中山區酒店推介
- 台北廉價住宿推介
- 台中酒店推介
- 台灣清境民宿推介
- 住@台北西門町薆悅酒店(inHouse Hotel)
- 住@台北西門町頭等艙飯店(Airline Inn)
- 住@台北寶格利時尚旅館(Burgary Hotel)
- 住@台北丹迪旅店-天津店(Dandy Hotel Tianjin)
- 住@台北馥敦飯店-復北館(Fullerton Hotel North)
- 住@北投倆人旅店(Hotel Double One)
- 住@台中碧根行館(Beacon Hotel)
- 住@台中公園智選假日酒店
- 住@清境香格里拉音樂城堡
- 台灣iTaiwan免費Wifi開放遊客申請
- 如何申請台灣7-11 免費wifi帳號
- 2013年清境、台北自由行：
150 路公車是否取消了, 我9月尾到台中, 也是入住智選酒店, 請問有沒有其他巴士呢? 謝謝