2013年日本關西、北陸賞櫻自駕遊

上年3月尾嘅京阪之旅，本來一心想到京都、大阪賞櫻，只可惜舊年天氣回暖嘅時間比正常遲左，攪到係我地旅程期間只係二條城睇到少少早開嘅櫻花。所以今年決定再接再厲，plan好係櫻花盛開期再到京阪賞櫻，點知今年情況剛好與上年倒轉，唔係遲開，而係早開左足足一個星期。

今次旅程原本嘅計劃係八日行程全程都係大阪、京都、神戶同奈良一帶嘅櫻花名所賞櫻，但係當越黎越接近出發日子時，日本各大櫻花預測網站嘅資料都顯示關西嘅櫻花已經提早開花，數手指計一計，到我地到達關西果陣，應該已經係櫻吹雪嘅花期末段，已經唔會再有櫻花盛開嘅靚景。

咁嘅情況唯有調整行程啦，好在所有酒店都係經樂天旅行book，房錢未俾而且三日前仲可以取消，所以決定臨時變陣，縮短係關西嘅時間，轉戰較遲開花嘅北陸，同時亦加遊高山同白川鄉兩地。另外，亦係豐田租車網更改租車個booking，因應行程編排將租車日數延長多一日。

最後，今次八日七夜日本關西、北陸自駕之旅嘅行程就鐵定如下：

Day 1：澳門至大阪，夜遊大阪城，住宿大阪心齋橋Cross Hotel Osaka。

Day 2：開始自駕，遊覽大阪櫻之宮公園、萬博記念公園，睇下呢兩處櫻花名所仲有冇櫻花睇，遊覽京都市

區，住宿京都新・都酒店。

Day 3：遊覽京都醍醐寺、平安神宮、仁和寺呢D開花較遲嘅櫻花名所，繼續住京都新・都酒店。

Day 4：離開京都前往高山市，途經彥根市，遊覽琵琶湖邊嘅櫻花名所彥根城，遊覽高山市

，住宿高山市本陣平野屋別館。

Day 5：離開高山，沿途遊覽白川鄉、金沢近江町市場同埋兼六園，住宿加賀片山津溫泉佳水鄉。

Day 6：返回大阪，沿途遊覽東尋坊、敦賀市日本海さかな街魚市場，住宿大阪心齋橋Hotel Vista Grande Osaka。

Day 7：遊覽櫻花名所吉野山，返回大阪還車，心齋橋shopping，繼續住大阪心齋橋Hotel Vista Grande Osaka。

Day 8：回程返澳。

想知我地最後睇唔睇到櫻花，就要留意之後嘅每日遊記啦！

以下先將整個行程嘅重要景點用Google Map整理出黎先。

在較大的地圖上查看2013年日本關西、北陸賞櫻自駕遊

今次旅程嘅旅費比平常貴左少少，主要係由於Air Macau機票超貴，但因為有老人家同行唔想經香港，所以貴都冇法，其次係因為行程中有兩日要住京都，而且其中一日仲係星期六，所以京都嘅住宿費比較貴，至於其他酒店價錢同埋租車就同平時差唔同，而且今次入住嘅兩間溫泉旅館都比較平，所以拉暈平均每人每日洗費都係HK$2100左右。

今次租車都係經豐田租車店網站租，因為想指定車款租Toyota Sienta呢款車。2010年到關西果次租過Toyota Sienta呢款車，覺得好啱四人同行使用。架車嘅車尾設計同七人車類似，屬於揭背式，車尾有足夠空間可以放得落3-4個26吋旅行喼。而且架車嘅長度又比七人車短，同一般四人房車差唔多，所以好適合一D怕開大車嘅朋友。而更重要嘅係，Toyota Sienta屬於P2 class，一日租車費用只係大約6500円，比P3 class嘅七人車平20%。

Toyota Sienta外觀(底下兩張係2010年果次影嘅)

車尾空間(下面果張係2010年果次影嘅)

車箱內籠

今次旅程總共租六日車，使用Hertz #1 Club會員卡嘅10%優惠，租車費合共35000幾円，平均每日唔洗6000円。另外，因為旅遊保險已經cover左租車自負額賠償，所以今次租車冇買到每日要1050円嘅免責補償制度。

以下是今次旅程中入住嘅五間酒店嘅介紹同住宿評價，有興趣可以睇住先。

• 住@大阪Hotel Vista Grande Osaka
• 住@大阪Cross Hotel Osaka
• 住@京都 新・都酒店(New Miyako Hotel)
• 住@飛騨高山本陣平野屋別館
• 住@加賀片山津溫泉佳水鄉

最後，係今次2013年日本關西、北陸賞櫻自駕遊嘅每日遊記：

• Day 1：大阪城夜櫻
• Day 2：大阪櫻之宮公園、萬博記念公園
• Day 3：京都醍醐寺、平安神宮、仁和寺
• Day 4：彥根城、高山市
• Day 5 (Part 1)：宮川朝市、白川鄉
• Day 5 (Part 2)：金沢近江町市場、兼六園
• Day 6：東尋坊、日本海さかな街漁市場
• Day 7：吉野山
• Day 8：旅程結束啦！