2013年日本關西、北陸賞櫻自駕遊 – Day 7：吉野山

奈良縣吉野山係日本出名嘅賞櫻勝景，而且開花時間一向較遲，花期亦較長，所以今次計劃行程嘅時候，將吉野山放係倒數第二日先去。不過今年因為天氣早左轉暖，關西各地嘅櫻花普遍早左開花，就連吉野山嘅櫻花都早左好多日開，我地係4月11日去已經過左滿開期，而且更已經凋落左大半。

2013.4.11 | 晴

呢兩日Hotel Vista Grande嘅住宿並唔包早餐，所以起身後先行過去一蘭拉麵食碗麵先。

跟住去酒店車房攞返架車出發。

今日嘅行程只係去吉野山。吉野山位於奈良縣南部，距離大阪市中心大約70公里，開車個半鐘左右就可以到達。從大阪去吉野山嘅高速公路只係去到奈良縣嘅葛城市為止，之後仲有一段封閉式嘅國道去到橿原市。由橿原市開始需要行駛大約20公里嘅一般道路先會去到吉野山山腳，不過路面狀況都OK，並唔難行。

呢度係JR吉野山駅，如果坐JR係呢度落車之後可以轉坐纜車或者接駁巴士上山，但呢日因為超多人，所以唔少人選擇步行上山，好辛苦啊。

呢隻就係由大阪開往吉野山嘅火車。

每年4月11日同12日，係吉野山金峰山寺會舉行一個叫花供懺法会嘅法會。我地去呢日正正遇著法會舉行嘅第一日。本黎以為好好彩可以參與下呢D節慶祭典，點知因為咁嘅原故呢日上山嘅人超超超多，吉野山上嘅遊人簡值係迫爆。唔單止想搵個車位泊車都搵唔到，就連架車想行快兩步都好難。最後只能夠無奈地開住架車以龜速圍住吉野山兜左個圈就落山走人。

係吉野山山腳有兩條路可以上去吉野山，一條係西面距離較短嘅15號縣道，另一條就係東面需要兜一個園所以比較遠嘅37號縣道。呢日15號縣道封閉左，車輛只能夠用37號縣道上山，而且因為車太多，超塞車，大排長龍。

吉野山上嘅道路係山路，路面好窄，而且山上迫滿遊人，人車爭路，開住架車真係一步一驚心，如果一個唔小心撞到人就大件事，好在日本人都比較禮讓，見到車黎都會行埋一邊讓你架車過，但係因為路面實際太窄，人又多，有時D人想讓都搵唔到位可以走避。

係迫滿人嘅窄路上行車固然危險，而更危險嘅係我竟然行錯路駛左入去一條山中小路，下圖GPS中粉紅色嘅就係呢條小路。因為太危險冇時間影相，下面就用Google Map嘅街景圖片俾大家睇下。

係呢個路口應該右轉去返15號縣道，但我地見左邊寫住有停車場，咪轉入去睇下囉，點知入面所有位都已經full parking，就咁越行越入，攪到返唔到轉頭。

呢段山路應該係一段登山步道，因為今日多人上山，所以都有唔少人行，但路面實際太窄，而且一邊係沿崖，又唔知條路通去邊，又要睇住D行山人士，所以行完條路都出左一身汗。條路原來係兜一個圈最後又返返去我地駛入去果個路口。如果大家開車上黎，記得小心D，唔好向上千本或者金峰神社方向駛(留意：金峰山寺同金峰神社係兩個唔同地方)。

日本由於山多，少不免多山路，今次行呢條已經唔算危險，係日本自駕咁多次，比呢條仲窄，仲危險嘅山路都行過。

俗語話無限風光在險峰，雖然行呢段山路係危險，但總算可以直接駛到高位睇到吉野山嘅滿山櫻花景色，雖然已經凋落，但都仲算唔錯。呢個位置如果唔開車而改由巴士站或者纜車站行過黎，路程唔短而且仲係斜路，好辛苦架。

總嘅呢講，吉野山嘅景點都係依山勢分佈係唔同高度嘅上腰，如果真係要漫步遊覽參觀，一定要有行山嘅心理準備同足夠體力。如果想舒舒服服，咁就要自己開車，同埋唔好選擇係祭典或者周末假日呢D時間，而且駕駛技術一定要有返咁上下啊。

離開吉野山之後係附近一個道之駅食午飯。

呢度有售賣附近農民生產嘅農作物。

返回大阪途中，係大阪環狀線上前面架大貨車嘅帆布突然鬆脫，成張帆布打埋我地車頭。因為當時高速行駛中，四線車道我地行中間，後面同左右兩邊都有車高速駛緊，想避都冇得避，只有硬食一野。好在只係塊帆布，事後出左高速公路檢查架車，發覺只係車頭整污遭左，架車冇整化，真係執返身彩。

今日係旅程尾二日，點都要留返半日係大阪shopping下，所以返到難波先去還返架車，還車果陣職員只係check油標係唔係已經入滿油，其他都冇睇，早知就唔係還車之前自己抹走之前塊帆布整到D污積啦。

今晚嘅晚餐-王將餃子，最後一晚竟然食中國餃子。

最後介紹呢雙布丁，好好味架，每次去日本都一定食，只係105円一個，只係Lawson先有得賣架。

– Day 7 完 –

>> 返回《2013年日本關西、北陸賞櫻自駕遊》總目錄