2013年日本關西、北陸賞櫻自駕遊 – Day 6：東尋坊、日本海さかな街漁市場

今日我地會返去大阪，由加賀溫泉去大阪嘅路程差唔多有270公里，如果直踩需要連續開三個半鐘頭車先到，比較辛苦。所以我地將佢拆成三段黎行，係路線中安排去兩處景點，第一個係福井縣嘅東尋坊，第二個就係敦賀市嘅日本海さかな街漁市場。

2013.4.10 | 晴，一時雨

朝早起身嘅時候發覺天氣麻麻，天陰陰就黎落雨。不過都冇辦法，先浸多次溫泉，再去食早餐。唔知點解日本溫泉旅館嘅住客總係女多過男，所以通常男湯好清靜但女湯就好多人好嘈吵。

早餐係食和洋混合嘅自助餐，味道一般，不過隻溫泉蛋就整得幾好味。

呢盒士多啤梨係尋日係近江町市場買落，今日係車上食。

今日行程第一站會去福井縣嘅著名景點東尋坊，呢樹係福井主要旅遊景點，面對日本海，由加賀去大約40公里，冇行高速公路用左大約九個字時間就到。

東尋坊入口。”歓迎”果兩個字係日文，同中文一樣都係welcome咁嘅意思，唔好以為人地寫中文啊。

進入左東尋坊之後有幾個可以免費泊車嘅停車場，我地直接將架車駛上去最近海邊嘅停車場。可能因為今日天氣比較唔穩定，時雨時晴，所以黎東尋坊嘅遊客亦唔多，場面冷清。

東尋坊前主要係一條手信街，今日只有大約一半店舖有開門。

係手信街盡頭行落樓級向海邊行冇幾耐，就係東尋坊啦，其實只係因為海水沖蝕而造成嘅奇特地形。

離開東尋坊我地下一站去到同樣屬於福井縣嘅敦賀市，敦賀市就係北陸自動車道旁邊，唔需要專登兜路去。我地係敦賀市其實只係去一個地方，就係呢個號稱日本海沿岸最大嘅漁市場-日本海さかな街漁市場。

呢個漁市場並唔係位於海邊，而係座落係敦賀市郊嘅一條國道旁邊。市場分為售賣手信同海產乾貨嘅乾貨區以及售賣新鮮海產嘅濕貨區，市場內嘅環境好整齊乾淨。

漁市場入面仲有多個食海鮮丼嘅食店。

我地選擇左去呢間食午飯。

走之前買左幾個香噴噴嘅燴番薯上路食。

唔洗兩個半鐘就由敦賀返到大阪，見時間仲早，順路去一去大阪造幣局睇下有冇櫻花睇。造幣局係大阪櫻花名所，呢度D櫻花比較遲開，今年要到4月16日先開始開放俾人入去賞櫻。

冇得入去唯有隔住鐵閘影返幾張相就走。

離開這幣局之後我地就開車返去今晚入住嘅Hotel Vista Grande Osaka check-in。今次係第二次住呢間酒店，會連續住兩晚，由於聽日仲要用多一日車去吉野山，所以今晚未還車住，暫時將架車泊係酒店停車場。[想睇酒店介紹同住宿評價可以參考呢篇住@大阪Hotel Vista Grande Osaka]

今晚主要係心齋橋一帶行下，呢間一蘭拉麵係24小時營業架，自從佢開左之後每次到大阪都有幫襯，不過呢度大部分時間都好多人排隊，想唔排隊最好係朝早九點前黎。

一蘭拉麵旁邊呢間章魚燒都好多人幫襯，今日行過見冇人所以第一次試試，不過味道唔係好得囉。

每次去大阪都會去蟹道樂刷一餐，不過感覺味道一次比一次差，唯一仲覺得好味嘅係以下呢樣蟹膏壽司。

除左蟹膏壽司之外今餐仲食左呢D。

最後用剩返嘅湯加蛋同米煮成嘅蛋花粥，以前曾經覺得好鮮味，不過今次呢鑊粥超咸。

今次唔算叫得多野，只係食左17000幾円。

– Day 6 完 –

>> 返回《2013年日本關西、北陸賞櫻自駕遊》總目錄