2013年日本關西、北陸賞櫻自駕遊 – Day 5 (Part 1)：宮川朝市、白川鄉

係高山市留宿一晚之後，今日再向北行，遊覽白川鄉同金沢市，不過因為時間有限，係金沢只會去近江町市場同兼六園遊覽，而且亦唔會係金沢留宿。

2013.4.9 | 晴，一時雨

高山本陣平野屋嘅房間面對貫穿高山市區嘅宮川，朝早起身第一時行出露台睇下朝陽升起嘅美景同感受下清新嘅空氣先。

之後再浸多次溫泉，跟住就去食早餐啦。

食完早餐，步行5分鐘去到宮川朝市參觀，不過因為呢日唔係星期六日，營業嘅檔攤唔係太多，行嘅人亦好少。

臨走時有一班外國遊客到達。係日本除左京都會經常見到西方遊客之外，另一個最多西方遊客嘅城市可能就係高山。

參觀完宮川朝市，再行返去旅館附近嘅中橋影下相先，呢度係高山市其中一個櫻花景點，不過由於高山天氣較冷，仲未開花。

中橋前面就係高山陣屋，不過裡面冇乜特別，要買飛先入得，所以冇入去。

高山陣屋前面係高山市另一個朝市，叫陣屋朝市，規模其實好小，只係賣D生果同農產品之類。

行完高山市兩大朝市，都係時候要返旅館check-out出發啦，今日會去白川鄉同金沢。其實高山、白川鄉同金沢呢三個地方係2010年曾經到過一次，今次故地重遊主要係帶屋企人去行一行，而且由於時間唔多，所以只係重點遊覽幾處景點。

從高山市去白川鄉行高山清見道路同東海北陸自動車道唔洗一個鐘就到，超方便。

白川鄉嘅中心就係呢條白川街道，景點都係街道兩邊，兩至三個鐘就可以參觀完畢架啦。

2010年黎嘅時候白川街道兩旁都仲有幾個停車場可以泊車，不過由2012年3月31日開始因為保護環境嘅關係，街道兩旁嘅停車場都關閉左，個牌指示可以泊去河對岸嘅村營停車場。

不過係白川街道兩旁仲有一兩處私人空地開放俾人泊車，泊一次收費800円，我地就係將架車泊呢度。

進入春天容雪時間，白川鄉旁邊嘅庄川河水量比較大，河水都好清，相信D水應該都好冰冷。

河上嘅吊橋相逢橋，對岸主要有個村營停車場，旅行團嘅旅遊車就係泊呢度，由高山或者金沢駛黎嘅巴士亦係停呢度。另外，對岸亦有個景點-合掌造民家園，以及一間食店。

白川鄉景色

如果要俯瞰整個白川鄉景色同影返張全景，就要上去半山上嘅荻町城遺址上嘅白川鄉展望台。上去展望台可以從和田家向北沿斜路步行上去，大約要行半個鐘，上次就係咁樣行上去，超辛苦。

如果自己開車，可以直接開車上去，今次去我地就係直接開車上去。展望台嘅Map Code係549 049 190，如果架車嘅GPS唔support輸入Map Code，就要自己係地圖上微調目的地位置。

在較大的地圖上查看白川鄉展望台位置

由於開車上去果陣冇時間影相，以下借用Google Map幾張街景圖片黎說明上去展望台嘅行車道路。

從白川街道向北行冇幾耐，會見到右邊呢條山路(360國道)，由呢度駛上去大約8-10分鐘就會去到展望台。

呢條路雖然係國道，但其實同一條鄉村道路冇乜分別，呢一段已經算係比較寬闊嘅路段，足夠兩邊對頭車行駛，但再向山上行D路就會變得越來越窄，所以如果冬天落雪嘅時候黎就唔好開車上去啦。

見到天守閣個牌就轉右行

呢段路面好窄，只足夠一架車通過，如果有對頭車，就要互相讓路先過到。

終於到達展望台，呢度有個停車場可以免費泊車。

– Day 5 未完，待續 –

>> 返回《2013年日本關西、北陸賞櫻自駕遊》總目錄