2013年日本關西、北陸賞櫻自駕遊 – Day 2：大阪櫻之宮公園、萬博記念公園

係大阪住一晚之後，我地第二日就要向京都出發啦。第二日嘅行程主要會去大阪櫻之宮公園同萬博記念公園呢兩個大阪嘅櫻花名所，雖然知道大阪大部份地方嘅櫻花都已經開始凋落，不過一場黎到冇理由唔去睇睇，就算只係得返櫻吹雪都好。

2013.4.6 | 雨

一早起身，先去豐田租車店攞車先。朝早街上面仲係好少人。

呢間位於難波車站附近嘅豐田租車店地方幾大，裡面車輛數目都唔少。租車店係地圖上嘅位置可以參考呢度。

去到租車店大約只係用左15分鐘就攪好晒手續，開車返Cross Hotel泊好架車，然後先係戎橋旁邊間Lotteria快餐店食個早餐先。

今日天氣認真麻麻，個早餐都未食完就已經落起雨黎。

行程第一站先去黑門市場行行先，好在呢度有瓦遮頭，出面落緊大雨都可以照行。呢日係星期六，所以有開門嘅舖頭會比平日多，如果係weekday去，因為有唔少舖頭唔開門，會冇咁熱鬧。

係黑門市場買左生果之後，就開車到今日行程嘅第一個賞櫻景點 – 櫻之宮公園。櫻之宮公園係大阪市內的櫻花名所，位於大阪城附近，前往嘅交通都好方便，不過附近泊車位並唔多，如果係櫻花滿開期間去，自駕的話可難較難搵到位。但係我地去呢日因為已經過左滿開期，再加上落住雨，所以就算係星期六公園內都只得小貓三幾隻。

如果唔落雨，櫻吹雪嘅景色都唔錯架，當大風吹D櫻花落黎果刻，滿天都係粉紅色嘅櫻花花瓣，再加上滿地粉紅色嘅櫻花，好浪漫架。

係櫻之宮公園影完相之後，開始向下一站萬博記念公園進發，萬博記念公園都係大阪櫻花名所之一，位於大阪市北面，開車行高速公路大約45分鐘就到。

去到萬博記念公園嘅時候天氣比係大阪時仲差，唔單止一路落雨，而且因為地方空曠，仲勁大風，幾乎連人都企唔穩。所以我地只係係公園中央嘅大陽の塔附近影下櫻花就算。不過呢度嘅情況同櫻之宮公園一樣，櫻花已經凋落得七七八八啦。

萬博記念公園嘅標誌性建築 – 大陽の塔

大陽の塔旁嘅櫻花大道，滿開時呢度真係超靚架，可惜……

原本嘅行程計劃中係plan左要去京都淀川河川公園背割堤睇櫻花，呢度係一個種左好多櫻花樹嘅河堤，開花果陣好靚架，不過我地去到果陣橫風橫雨，而且因為實行人潮管制，封左旁邊個停車場，要泊去好遠嘅臨時停車場再行過去，咁嘅天氣咁嘅環境點行啊。

由於天氣太過惡劣，我地決定放棄淀川河川公園背割堤呢個景點，提早去京都嘅酒店check-in先。我地係京都會留宿兩晚，因為疊住星期六嘅關係，呢兩晚要係京都搵一間兩晚都有房可以連住嘅酒店好難，最後總算搵到呢間位於京都駅後面嘅酒店，叫新・都酒店，酒店質素同位置都好好，不過由於京都酒店太full，所以價錢比平時正常價格貴左三成。[想睇酒店介紹同住宿評價可以參考呢篇住@京都 新・都酒店]

係酒店check-in好之後都仲係不停落雨，唯有去有瓦遮頭嘅河原町一帶嘅寺町通步行街同錦市場行下。

最後去返河原町通度果間丸龜製麵食晚餐，呢間舖頭上年住京都Best Western Hotel Kyoto果陣發現，我覺得好好食，不過似乎唔係咁啱同行家人嘅口味。

最後，返酒店食完上午係大阪黑門市場買嘅士多啤梨宵夜就係雷雨聲中進入夢鄉啦，希望第二日起身會見到好天啦。

– Day 2 完 –

>> 返回《2013年日本關西、北陸賞櫻自駕遊》總目錄