2011年沖繩快閃觀禮之旅(Day 1[上篇] – 那霸空港、國際通)

點解叫做"快閃之旅"？因為旅程實在太短，只係去得果4日，如果扣除左頭尾各半日坐飛機時間，實際係沖繩嘅時間只得兩日full day加兩個半日時間，加埋頂晒隆都只可以話係三日。本黎都想留多幾日玩耐D，不過撞正聖誕節，回程機位日日都full晒，冇計。

呢次旅程嘅主要目的，係出席屋企人係沖繩舉行嘅婚禮，所以又叫"觀禮之旅"。婚禮場地會係Day 3行程度post出黎，想睇沖繩教室嘅朋友請留意。

從香港去沖繩嘅飛機，只有香港航空一間有直飛，其餘嘅ANA同JAL都需要轉機，所以我地當然選擇搭香港航空啦。(Update：而家港龍航空都有機直飛沖繩，想搵香港至沖繩航班同機票價錢，可以Click呢度睇下。)

香港航空去沖繩嘅飛機係上午11:10起飛，飛行時間大約只係需要兩個鐘多D，日本時間下午兩點半左右就到。(Update：而家航班時間好似推遲左15分鐘。)

沖繩那霸空港嘅規模其實都唔細，不過同國內線相比，國際線大樓就相當細啦，國際線大樓只係單層建築，入境同出境係同一個地方，而且候機室只有一個，即係話同一時間只可以處理一班出發航機的旅客。

呢度係國際線大樓出面，感覺有D似新加坡嘅Budget Airline Terminal。

註：因為掛住行冇時間影相，唯有係Google Map度截張實景圖片黎頂檔

那霸機場離那霸市中心並唔係好遠，而且有單軌火車連結機場同市區，所以由機場去市區相當方便。

單軌火車嘅那霸空港總站設係國內線大樓對開，出左國際線大樓之後，大約行3至5分鐘到隔離嘅國內線大樓，照路牌指示上二樓再行過天橋就到。

註：因為掛住行冇時間影相，唯有係Google Map度截張實景圖片黎頂檔

由於行程緊湊，我地只會係那霸住一晚，我地入住嘅酒店叫Okinawa Nahana Hotel and Spa，位置係正縣廳前駅同旭橋駅中間，由那霸空港駅坐單軌火車，5個站就到旭橋駅，出站之後行5分鐘左右就到酒店。

因為忙住攪手續，竟然望記影呢間酒店嘅相，唯有再向Google Map借張酒店外觀相黎用住先。

Okinawa Nahana Hotel and Spa其實並唔係我嘅首選，計劃旅程嘅時候其實已經搵左好多那霸酒店嘅資料(註：呢D資料我已經整理成呢篇《沖繩那霸酒店推介》，有需要可以去參考下)，本來係想住Hotel Rocore Naha或者Daiwa Roynet Hotel Naha Kokusaidori，不過由於同行嘅部分人會順便去埋大阪，所以買左ANA嘅Package，而Package係那霸嘅酒店選擇唔多，比較理想嘅就只得Okinawa Nahana Hotel and Spa呢一間，所以其他人都唯有訂埋呢間酒店囉。

係酒店check-in完安頓好之後，都已經4點幾。因為今次停留那霸嘅時間唔多，所以要爭取時間，即刻出去國際通行街shopping。

由酒店行去國際通入口其實並唔遠，只係600米左右，不過今次一家大細有老有嫩，步速較慢，所以都要行10分鐘先到。

其實國際通主要都係一條手信街，如果打算買手信，最好係呢度買啦，因為根據夾價結果，同一件商品係其他地方賣嘅價錢唔會平得過係國際通嘅價格。

To be continued…