2012年京阪之旅(Day 3[上篇] – 日產租車京都駅前店取車)

係京都短暫停留兩晚之後，今日要離開京都去有馬溫泉啦。因為去有馬住一晚之後會轉去大阪，所以有大件行李跟身，為免拖住行李坐公共交通工具，我地選擇係呢兩日自駕。

由於河原町同烏丸通一帶並冇租車公司分店，所以只有選擇係京都駅附近嘅租車店攞車，而事實上係京都大部份租車店都係京都駅附近，另外一D分店係較遠嘅地方，所以京都駅會係比較方便攞車嘅地方，起碼交通方便，河原町去坐巴士都好方便。

如果要拖住行李直接去租車店會好麻煩，所以朝早起身之後，先由一個代表(即係我)，先去租車店攞車，再開架車返酒店接埋乘客同行李。

酒店對面就有巴士站，有巴士直去京都駅，因為仲好早冇乜人坐又唔怕塞車，所以決定坐巴士去京都駅攞車，唔洗行去地鐵站咁麻煩。

攞車間租車店係日產租車京都駅前店，就係京都駅旁邊嘅京都中央郵便局隔離，門口雖然細D，但好易搵，不過掛住攞車忘記左影租車店嘅相，下面呢張係係Google Map嘅實景照片嘅截圖，圖中紅框位置就係日產租車京都駅前店。

呢張係日產租車京都駅前店嘅位置圖。

加送兩張京都駅照片。

今次又係通過樂天旅行網站黎租車(有興趣知道租車手續嘅朋友可以參考呢篇如何通過日本樂天網租車嘅介紹)，向日產租車店租左最平果個Class – P1，不過都唔平啊，兩日都要成9,975円，冇買免責保償。

由於之後會由有馬溫泉直接去大阪，唔會再返京都，所以租車時選擇左係大阪還車。我地係大阪會住心齋橋道頓堀附近嘅Hotel Vista Grande Osaka，而最近呢區嘅日產租車店係難波OCAT店，係JR難波駅座building嘅地下負一層。因為大阪同京都相隔唔遠，所以異地還車都唔需要收charge。

因為冇得指定車款，所以事前都唔知會係邊款車，之前租呢個Class一般都會係March，不過今次係另一款，就係下面呢部車啦，日產Note。P1呢間Class通常係1300c.c.車，不過我覺得呢部Note有1500c.c.，因為都幾有力，而佢嘅車廂內籠比March闊落好多。(D相係中途停車休息果陣影架)

同以前一樣攞車時間大約用左半個鐘，Check完車就開車走人。弊… 原來出黎攞車嘅時候冇帶到酒店資料，雖然之前已經將所有電話number set左入部手機度，但係部手提電話留左係酒店房度。

點算好，冇電話number係手即係用唔到GPS，用唔到GPS即係等於盲左，點開架車返酒店。好在黎過京都幾次，對地形都有少少印象，唯有睇路牌開車返去。其實都只係兩條大直路，睇住路牌好易返到酒店。

我地住嘅Best Western Hotel Kyoto係冇停車場架，不過係佢對面(只係相隔唔夠10米)就有個停車場，返到黎先將架車泊係度。

To be continued……