2012年京阪之旅(Day 2[中篇] – 平安神宮、祇園)

離開二條城之後，仲未夠鐘食晏，於是決定去埋另一個之前未去過嘅景點 – 平安神宮。平安神宮位於東山區，只需要由二條城前駅坐地鐵5個站去東山駅，再行10分鐘左右就到架啦。

係東山駅出左地鐵站之後，向右行會見到條叫白川嘅小溪，再沿住白川向北行大約800米左右，大約10分鐘時間就會到達平安神宮架啦。

途中有一排小烏居同一個袖珍神社，見幾得意影低佢。

係白川盡頭，會見到呢個代表平安神宮入口嘅大烏居。

再行多400幾米就到平安神宮啦。

入到神宮只係影左幾張相，個相機竟然自己熄機？ 冇電！

入去平安神宮係免費架，不過如果要入埋去內苑，就要俾入場費。我地係門口裝過入去，發現內苑D櫻花完全未開，冇櫻花襯托只係一般日本園林，所以都係唔入去啦。

離開平安神宮嘅時候，已經係中午時份，係時候食飯啦，於是決定返去河原野搵食，順便返酒店為相機叉電。

係平安神宮前面嘅巴士站，有巴士可以去到河原町通，巴士站就係正酒店對面，好方便。不過上次領教過京都巴士迫人嘅慘況，今次都有D驚驚地，好彩未係放工時間，都仲算OK。

記得係07年第一次去京都果陣，去左河原町通果間魚心壽司，食完之後真係覺得好正，所以今次都打算再去食一次，出發之前已經print左張10%折扣券帶埋去，不過原來折扣券係星期六日同假期係唔用得架，我地果日就係星期六，冇得用。

魚心壽司河原町通店就係正我地間酒店Best Western Hotel Kyoto行出黎嘅路口對面，就係相中間建築物地下。

食完嘢先返酒店為部相機叉電，跟手就去左酒店隔離呢間Loft同樓上嘅Uniqlo京都分店shopping。

__________

係河原町通附近行到咁上下，開始出發去清水寺啦。今日係清水寺開放夜間參拜嘅第一日，雖然知道睇到櫻花嘅機會好微，但都要去睇下先心熄。

由於時間尚早，我地先沿住鴨川慢慢行去祇園，不過個天時雨時晴，有D掃興囉。

去到祇園啦，先係路邊呢間丹波屋買串燒小丸子食下。

經過花見小路通，因為之前去過三次，今次就唔入去啦。

先入去よーじや買D面油紙，超貴，但唔知點解每次都會買。

To be continued……