《2010年新春台北之旅》- 第一天(4) – 美麗華影城

今年以黎最中意嘅電影係阿凡達，只可惜澳門冇3D影院，只係睇左2D。所以今次到台北其中一個節目就係去睇返次阿凡達3D。上網搵過資料，原來台北美麗華影城嘅iMax影院係東南亞最大嘅，所以一於就去見識下。

台北嘅戲院都可以網上訂飛，所以出發前係澳門上網訂左先，我地去睇果晚係2月14日情人節，又係大年初一，而且我地要訂嘅係iMax影院，只有300幾個座位，所以好多人爭位。上美麗華影城嘅網頁睇過原來2月10日下午6點開始就可以訂2月14日開始嘅戲飛，所以果晚一返屋企就即刻上網book，但係都係慢左，好位冇晒，只訂到前面第四行嘅座位。因為係iMax又係3D，所以戲飛嘅價錢都貴好多，要NT$420一張，另外加收網上訂票費用每張NT$20，不過計埋都平過香港。

係網上訂戲飛好簡單，以下介紹一下訂美麗華影城戲飛嘅方法俾有興趣嘅朋友參考。

首先去佢線上訂票網頁，可以先查詢場次以及查詢票價。要訂飛就click立即訂票個icon，跟住選擇戲院，要留意只有“美麗華大直影城”以及“iMax影廳”先係位於美麗華百樂園（即係有摩天輪果度），而“美麗華天母影城”係位於另一個地方架。

選擇戲院之後就可以選擇要睇嘅戲名（如果係3D，戲名隔離會顯示3D字樣），然後再選擇場次，之後係跟住個畫面選擇“非會員登入”（好似只有台灣人先可以登記做會員），然後係全票度選擇人數（如果你有優待券就係優待券度選擇人數）。之後再click“下一頁”，等一陣會顯示座位表（如果冇咁應該係你電腦冇安裝Java），系統會同你自動選擇最好嘅座位，用藍色顯示，如果唔中意可以用mouse點走佢，再自己選擇座位，會以綠色顯示。想係美麗華iMax影院選擇個靚位，可以參考呢個網頁：美麗華大直影城IMAX座位表解析。

確定之後再click“下一頁”，然後輸入你嘅email、姓名、手機號碼、信用卡號碼以及信用卡種類，並且點選“我已經閱讀並同意”前嘅方格，確定無誤後再click“立即訂票”。之後會出現“你已經成功訂票囉”嘅頁面，將呢一頁print出來，去到售票處出示就可以正式買飛，不過要係開場40分前去到取票，否則訂票就會失效架啦。戲飛錢會係買飛時先至收，係唔會係你張卡度扣錢架。

ps: 其實訂票時填寫嘅全部個人資料，包括email、姓名、手機號碼、信用卡號碼，通通都可以亂寫架，系統一樣會顯示訂票成功。

* * * * * * * * * *

美麗華百樂園係上兩次去台北時都有到過，當時捷運文湖線仲未開通，所以需要先坐捷運到劍潭站，再坐商場嘅接駁巴士到美麗華。而係09年中文湖線開通之後，終於可以直接坐捷運去美麗華，唔需要轉巴士。不過由中山站出發，坐捷運到美麗華百樂園所在嘅劍南路站需要轉兩次車，先到台北車站轉一次，再到忠孝復興轉多一次，加加埋埋都需要30分鐘，同以前去劍潭站轉接駁巴士所用嘅時間差唔多。文湖線係木柵線向北邊嘅內湖區嘅延申，所以一樣都係採用細車廂，同埋大部份路段都係架空。

美麗華百樂園就位於劍南路站隔離，出左車站行過馬路就係。因為係年初一再加上情人節，所以人超多。

我地先搭扶手電梯直接上去五樓嘅售票處，買之前係網上訂好嘅戲飛。買飛時可以再加D錢買埋有飲品同爆谷嘅套票。

因為仲未夠鐘，所以先係商埸行下，不過人太多，而且亦無乜特別舖頭好行。我地買左6：40果場阿凡達3D iMax戲飛，所以行到6：15就上去六樓嘅戲院入口攞爆谷同飲品，不過睇戲嘅人好多，排左好耐先攞到，好彩都冇遲入場。

終於入得埸啦，入埸時工作人員會派發3D眼鏡，男女size唔同，走嘅時候工作人員會係門口收返。

我地雖然坐第四行嘅前排座位，不過個iMax銀幕真係超大，所以並無太大影響，亦唔覺得有死角位，全個銀幕都可以睇晒，而且真係好震撼。睇3D的確比2D正好多，不過睇得耐對眼真係幾辛苦，需要耐不耐休息一下。

睇完阿凡達已經係九點幾，出到街發現正在落雨，好彩早有準備帶左雨傘。回程我地選擇坐接駁巴士去劍潭站，先到士林夜市食完嘢，再返酒店。

第一天行程完結