《2010年新春台北之旅》- 第一天(3) – 度小月

介紹完酒店，係時候寫返第一日嘅行程。我地將行李寄存係旅店之後，就即刻出發去食午餐。之前睇天氣報告話台北有雨，但係呢一日就不知幾好天，仲有太陽添，以為好正啦，點知之後就. . . . .日日落雨。

最近丹迪旅店嘅捷運出口係中山站3號出口，就係正新光三越本館門口，由丹迪旅店行過去只係300米左右，不過要留意呢個出口冇扶手電梯，如果拖住行李就千其唔好行，可以行前少少去新光三越2館隔離嘅1號出口，果度就有扶手電梯。

丹迪旅店附近天津街街口嘅觀光導覽地圖

中山北路一段與南京東路/南京西路交界處嘅十字路口，係往來丹迪旅店與捷運站嘅必經之路。

新光三越本館對出嘅南京西路

新光三越本館門口，燈柱隔離就係捷運3號出口。

大年初一新光三越開門前有拜神同埋燒炮仗

入到捷運站當然係先到詢問處窗口買返張悠遊卡，使用悠遊卡撘捷運可以有八折優惠，而且除左捷運之外乘坐公車亦可以使用，好方便。悠遊卡一張NT$500，其中NT$100係按金，其餘NT$400可以使用，用晒可以增值，走之前可以再去返任何一個捷運站入面嘅詢問處窗口退返未用餘額同埋NT$100按金。我地走嘅時候每張卡退返NT$234，即係搭捷運只係用左NT$266。

* * * * * * * * * *

今日第一站係去忠孝敦化嘅度小月食午餐，其實本來係想去果度間鼎泰豐食小籠包，但係去到門口貼左張紅紙寫住初五啟市。跟住行埋去東區粉圓，又係初五啟市。

當時仲未夠11點半，唯有係度小月門口等開門。台灣度小月D食物真係好好味，最中意食佢嘅擔仔麵，撈麵同湯麵都好正，NT$50一碗真係唔貴。另外蝦捲同麻油雞都係必試美食，大腸亦唔錯，不過要食鹵水大腸，炸大腸就麻麻。呢餐食左NT$850。

台灣嘅小S應該係度小月嘅常客，我地07年第一次去度小月時就係果度遇到佢，今次我地食完走時又撞到佢入去食嘢，真係有緣。

大年初一好多舖頭都仲未開門，所以食完度小月決定坐捷運去市政府站，先到誠品書店買書。大年初一“書書聲”好似唔係咁老泥，不過百無禁忌，今次係受朋友所託代為購書。

買完書之後我地再到新光三越A4嘅B2層食下午茶，就係呢間AUNT STELLA’S。夾餅加雪糕，再加埋一杯野飲，破費NT$320。

之後再買用雞蛋殼整嘅雞蛋布丁，NT$180一盒。上次食過覺得好好味，不過今次食落覺得味道只係一般。

買完布丁時間已經係下午3點幾，所以先返丹迪旅店Check-in。

待續. . . . . .