《2009年聖誕首爾之旅》- 第五天（完）

2009年12月26日(星期六)，天晴，氣溫：around零度

澳門航空去首爾嘅航班時間真係麻麻，去程冇得訓已經好慘，回程要晨早起身仲慘。由首爾至澳門嘅航班朝早8:00起飛，6:00要到機場check-in，所以一定要坐第一班由首爾市區開出嘅機場巴士到機場。

明洞嘅世宗酒店係6015號機場巴士嘅第一個站，第一班巴士係呢度開出嘅時間係4:50，不過架巴士唔係停係度等客，只會到接近4:50時先會唔知係邊度駛到黎上客。

因為怕Miss左巴士，所以我地提早左check-out，未到4:15已經去到世宗酒店門口，不過未見有巴士，好彩可以入去世宗酒店大堂度坐低，如果唔係真係會凍死街頭。本來以為尋晚落左雪，今朝會係地上見到白蒙蒙嘅雪景，點知又係失望，只係見到路邊仲留有少少雪粉。

巴士好準時係4:50到，上車嘅除左我地就只得另外3個韓國人。之後架巴士會駛經其他幾處上落客地點，上左大約10個人左右就直驅機場啦。因為太早冇乜車嘅關係，唔洗一小時已經到達機場。

去到counter等check-in，點不知澳航地勤竟然通知班機要delay四個鐘頭，中午12點先走得。不過就可以先做定check-in，而且仲寫左張delay證明，不過都冇用啦，保險要delay 5小時以上先有得賠。另外佢地又俾左每人一張消費券，好似有₩10,000可以係指定地點食嘢，不過搵唔到個地方，最後都係冇用到。

因為實在太眼訓，所以入到候機大樓之後，食完早餐再買D嘢之後就上左休息室搵個好位訓覺，到12點終於可以上飛機返澳門。

其實韓國並唔係我地太鍾意嘅旅遊目的地，一來值得去嘅地方唔係太多，二來食物唔啱口味，三來語言文字相差好遠（雖然我地都係唔識日本，但係日本起碼睇得明佢D漢字。），再加上shopping又唔係我地強項。今次去換左太多錢，回程時仲有百幾萬係手未洗，好彩而家韓元仲係升緊，希望遲D放出去賺返筆啦。

本次旅程完結