2008年秋季京阪神紅葉＋白浜溫泉之旅（第七天） – 姬路城、神戶

2008年12月1日
梅田 > 姬路 > 姬路城 > 神戶 > 三宮、元町 > 神戶港 > 大阪

今日既行程係先去參觀世畀文化遺產姬路城，再去神戶食神戶牛和睇夜景。

去姬路坐JR特急要差唔多一個小時，單程車票好似要大約1,000円，所以用2,000円買返張一日關西JR-West Rail Pass用黎去姬路、神戶，再返大阪有著數，可以節省差唔多三分之一車費。

 
呢張關西JR-West Rail Pass係買既時候要即時填上姓名、護照Number以及使用日期，所以最好等真正用果日先係車站既JR Counter購買，以免因臨時改變行程而造成浪費。張飛唔可以拆出黎，入車站時唔係行入閘機，而係行傍邊既通道，只需要俾工作人員睇下張卡就可以架啦。

坐一個鐘車只係睇一個景點都幾浪費時間架，不過話晒係日本著名景點，又係世畀文化遺產，都算值得。

 
由JR姬路駅望過去，遠處個城就係姬路城，一直行10-15分鐘就到架啦。

國寶姬路城，先係出面影返張先。

姬路城近鏡

呢個係團體照指定影相地點

姬路城城門

姬路城主樓

姬路城主樓頂層

從姬路城頂層望出去既景色

參觀姬路城需時兩小時，我地由11點行到中午1點，參觀完後就急急腳坐返JR去神戶。點解咁急？因為趕住去食神戶牛Lunch囉。聽講食神戶牛係Lunch時間食會平過晚飯時間好多，所以我地都專登選擇係中午去食。又係聽人講呢間叫Mouriya (神戸ステーキレストラン モーリヤ)既好好味，所以去到神戶三宮站落車之後，就跟住地圖去搵佢。

 
出左JR三宮駅沿三宮本通商店街或者Central St.向神戶駅方向行，冇幾耐就會見到呢個街口，前行50米 就到Mouriya架啦

Mouriya就係呢座大廈三樓

Mouriya店內，可能已經係下午2點幾既關係，店內只得唔夠10個食客，可以坐係度睇住廚師整俾我地食

Mouriya三宮店有個識講國語既姐姐仔，所以唔洗雞同鴨講，經佢介紹，我地Order左兩個Set，分別係唔同部位既神戶牛，呢度就係兩個Set加埋既份量黎架啦，唔好睇佢只得咁少啊，一個Set要成4,800円，所以呢餐食左9,600円，都算幾豪架啦。

先黎個南瓜湯，好味

跟住個廚師會一邊整一邊俾你食，除左牛之外仲有幾件配菜，之後仲有碗飯送埋架，不過份量真係唔足夠囉。

呢餐食左差唔多一萬円，不過覺得味道麻麻，而且又唔飽，唯有出去搵野食啦。神戶一帶都唔係太啱我地行，我地只係三宮、元町附近行下，去完中華街食左d小食，跟住就由元町駅坐一個站JR到神戶港。去到神戶港，發覺都係冇咩特別，又搵唔到啱食既野，所以係神戶港影左幾張神戶夜景之後，決定返回大阪。

 
神戶風景，隨便影幾張交差。

因為今晚係旅程last night，又因為中午果餐神戶牛實在令人失望，所以返到大阪之後，我地決定到道頓堀既道樂蟹，食返餐好既。

 
上次去大阪時幫襯過道樂蟹，果次叫左Set網燒會席，可惜因為自己唔係太識點燒，整出黎唔係太好味。吸取左上次經驗，今次決定叫一Set Sabu Sabu既，另外再叫燒好左既蟹腳，再加一Set蟹膏壽司，呢餐果然係……正！

 
先黎頭盤…蟹刺身

Sabu Sabu…

呢份係另外order既網燒蟹腳

呢碗係用鐹底剩餘物資煮成既蟹粥

呢份係蟹膏壽司，食到中途先記得影相。

最後仲有呢個綠茶雪糕

呢個係道頓堀橋對開既大屏幕，每隔一段時間就會由廣告轉為橋上即時實況，我地今次被安排坐二樓窗口，對正橋同屏幕，可以一邊食野一邊睇野。

呢餐食得好滿意，而且都只係8千円。食完今次日本最後晚飯，係時候返酒店pack行李啦。