2008年秋季京阪神紅葉＋白浜溫泉之旅（第三天） – 嵐山、心齋橋

2008年11月27日
梅田 > 嵐山 > 京都駅 > 心齋橋 > 梅田

今日既行程原本係計劃上午去京都嵐山，下午去二條城，然後再去貴船神社睇紅葉。但後來覺得京都既紅葉並唔係想像中咁靚，團友又想多D時間去shopping，所以下午既行程改為去心齋橋一帶行街。

吸收左尋日食早餐既經驗，今日我地9點前就去酒店19樓食西式早餐。食完早餐大約9點半左右，去到阪急電車駅時，啱啱好可以坐到一班特急列車。從梅田坐阪急電車去嵐山，需要係桂站轉一次車，因為上一次去京都時已經坐過，所以咁次完全冇難度。

阪急電車內

上次去京都已經去過一次嵐山，今次去主要係想試下坐小火車睇紅葉既感受。我地大約10點半到達嵐山，離坐小火車時間仲有一個半小時左右，可以慢慢影下相先。同上次相比，今日既嵐山真係人頭湧湧。

嵐山公園一景

滿山紅葉

渡月橋上

因為上次已經入過天龍寺，所以今次冇再入去，而改由側邊小路穿過竹林去小火車嵯峨野站上火車。

由呢條路入去就係竹林

竹林

果然係紅葉季節，嵯峨野車站內人山人海，原來小火車可以買企位架，好彩我地之前係機場JR Counter買定車飛，有位坐。

嵯峨小火車

本來對於今日坐小火車欣賞紅葉既節目好有期望架，但原來發覺都係不外如事，真係有D失望。

嵐山景色

再黎嵐山景色

12點15左右小火車到左亀岡站，因為12點32分有一班車由JR馬堀站去京都駅，而由小火車亀岡站行去JR馬堀站都要行10分鐘，所以一落車就要急急腳咁行，唔係miss左呢班車就要等多半個鐘先有車。

小火車亀岡站外既田野

第一次由京都駅坐JR返大阪，唔知原來大阪只係個中途站，開頭睇極都搵唔到有寫住去大阪既火車，後來問車站人員先知原來去姬路方向既火車全部會經大阪駅，最後兜兜轉轉白白浪費左半個鐘時間。
到左大阪駅又要轉地鐵，去到心齋橋都已經係下午3點啦，第一時間搵食啦。今次既目標係美津の大阪燒，本來print左張coupon，可以有杯免費贈飲架，可惜冇帶去。

大阪燒套餐，盛惠2050円

燒完個樣

食完之後既節目就只係行街，冇咩好介紹。

行行下係千日前近南海電鐵車站果邊入口附近，發現呢間餅店好多人排隊喎。

原來係買呢隻芝士蛋糕

我地當然唔汁輸買件返酒店食啦

接近7點幾果陣，個天開始落少少雨，所以我地都提前返酒店，返房前順便上酒店27樓個展望台睇下夜景。

位於大阪格蘭比亞酒店27樓既展望台，其實呢度有幾間高級餐廳，只係兩邊有落地玻璃可以俾人睇景，不過免費野都唔錯囉。

由於落雨都唔想行得太遠，最後只係附近間吉野家食碗平價牛肉飯。唔知點解係日本吉野家好似冇女仔入去食，唔通D女仔嫌佢cheap？

因為明日會自駕車去白浜，所以食完飯之後我地就行去明日取車既日產租車公司，預先搵定位置方便第二朝可以準時去到。日產租車公司就係大阪第一酒店入面，其實只係一個小小既counter，只得兩名職員。
原來由JR大阪駅附近地下有一條面積好大既地下街，由JR大阪駅去大阪第一酒店可以由地下街行過去，好方便。地下街亦有好多商店同藥房，不過D野就比心齋橋貴。

提到藥房，關西既藥房比起東京果D真係大規模好多，產品種類又多好多，除左藥物同化妝品，仲有好多唔同種類既家屋清潔用品，所以去大阪藥房係必到之地，而心齋橋就係藥房最多又較平既地方。

經過多次格價，我地發現係心齋橋既呢間藥房可以講得係全區最平，比起近道頓堀果D平左差唔多20%架。

呢間藥房都係位於心齋橋筋商店街上，地址係南船場三丁目5番17號，如果係地鐵心齋橋站大丸百貨公司出口出黎，沿心齋橋筋商店街向北行，經過Loft再過埋長堀通，就會見到一間叫Step既鞋店，再行前50米就係架啦。